اسلام مخالف ڈچ سیاستدان کو دھمکی دینے پر پاکستانی کرکٹر کے خلاف کیس

ہالینڈ کی ایک عدالت نے 29 اگست منگل کے روز پاکستانی قومی کرکٹ ٹیم کے سابق کھلاڑی خالد لطیف کے خلاف اسلام مخالف یورپی سیاستدان دان گیئرٹ ولڈرز کے قتل پر اکسانے کی مبینہ کوشش کے الزام میں مقدمے کی سماعت کی۔

ہالینڈ کے سرکاری پراسیکیوٹرز نے عدالت کو بتایا کہ کرکٹر خالد لطیف نے سن 2018 میں سوشل میڈیا پر پوسٹ کی گئی اپنی ایک ویڈیو میں ولڈرز کو قتل کرنے کا مطالبہ کیا اور اس کے لیے 23 ہزار ڈالر کے انعام کی بھی پیشکش کی تھی۔

یہ اس وقت کی بات ہے جب ولڈرز نے پیغمبر اسلام کے کارٹونز کا ایک مقابلہ منعقد کرانے کے اپنے ایک منصوبے کا اعلان کیا تھا۔ اسلام میں پیغمبر اسلام کی تصاویر بنانا ممنوع ہے اور بیشتر مسلمان ایسے کارٹونز بنانے کو شرعی نقطہ نظر سے غیر اسلامی اور حرام فعل سمجھتے ہیں۔

کئی جانب سے جان سے مارنے کی دھمکیاں ملنے کے بعد اور خاص طور پر پاکستان میں ہونے والے شدید مظاہروں کے سبب گیئرٹ ولڈرز نے کارٹونز کا مجوزہ مقابلہ منسوخ کر دیا تھا۔ وائلڈرز نے منگل کے روز عدالت کو بتایا کہ ''ان(لطیف) کا مقصد نہ صرف تشدد کے ذریعے انسانی زندگی کا خاتمہ کرنا تھا، بلکہ اس نے اپنی اپیل کے ساتھ ایک ڈچ نمائندے کو خاموش کرنے کی بھی کوشش کی۔''

استغاثہ نے جرم ثابت ہونے پر خالد لطیف کے لیے 12 برس کی قید کی سزا کا مطالبہ کیا ہے۔ پراسیکیوٹر نے کہا، ''کارٹون مقابلے کو روکنے کے لیے قتل کا مطالبہ کرنا اور اس مقابلے کے منتظم کو قتل کرنے کے لیے رقم کی پیشکش کرنے کی وجہ سے سخت سزا دی جانی چاہیے۔''

کمرہ عدالت میں نہ تو خالد لطیف اور نہ ہی ان کا کوئی نمائندہ موجود تھا۔ واضح رہے کہ کرکٹر خالد لطیف پاکستان میں رہتے ہیں اور ہالینڈ کا پاکستان کے ساتھ حوالگی یا قانونی مدد کا کوئی معاہدہ بھی نہیں ہے۔ امید ہے کہ عدالت اس پر اپنا فیصلہ 11 ستمبر کو سنائے گی۔

ایک کرکٹر کے طور پر خالد لطیف نے ابتدائی دور میں شاندار مظاہر کیا تھا اور تقریبا ًآٹھ برس تک پاکستانی قومی ٹیم کے لیے کھیلتے بھی رہے۔ تاہم دبئی میں ہونے والے پاکستان کی سپر لیگ کے ایک میچ میں ا سپاٹ فکسنگ کے الزام کے تحت ان پر سن 2017 میں کرکٹ کھیلنے پر پانچ برس کی پابندی عائد کر دی گئی تھی۔

انہوں نے گزشتہ سال اپنی پابندی مکمل کی اور اس کے بعد سے وہ کراچی میں نسبتاً کم پروفائل کی زندگی گزار رہے ہیں۔ اب وہ کلب کی سطح پر کوچنگ کرنے کا کام کر رہے ہیں۔