’اپنے کردار کو سماج کی بھلائی کے لیے وقف کریں‘، مولانا محمود مدنی کا نوجوانوں سے خطاب

نئی دہلی: بھارت اسکاؤٹس اینڈ گائیڈس کے 75ویں یوم تاسیس پر جمعیۃ یوتھ کلب کے زیر اہتمام مدنی یوتھ سینٹر کیندکی دیوبند میں سہ روزہ تقریب منعقد ہوئی جس میں یوپی، راجستھان، میوات کے مختلف اضلاع سے 813 اسکاؤٹس اینڈ گائیڈس شریک ہوئے۔ خاص بات یہ رہی کہ 104 گائیڈس (خواتین ونگ) نے بھی پردہ میں رہ کر ایگزبیشن میں دستی ہنر مندی اور تخلیقی صلاحیتوں کا مظاہرہ کیا۔ پروگرام کے دوران مختلف قسم کے مقابلے بھی منعقد کیے گئے جن میں رنگوں کی شناخت اور نقشے کی مدد سے راستے کی تلاش، فاصلے اور بلندی کا اندازہ اور دیگر عملی مہارتیں شامل تھیں۔ ٹینٹ پچنگ، کلر پارٹی، مارچ پاسٹ، فرسٹ ایڈ، فزیکل ڈسپلے، کیمپ کرافٹ، کیمپ فائر کی نمائشوں نے سبھوں کو حیران کر دیا۔ آخری تقریب میں صدر جمعیۃ علماء ہند مولانا محمود اسعد مدنی، ناظم عمومی مولانا حکیم الدین قاسمی، ہرجیندر سنگھ ایس ٹی سی ناردن ریلوے، محمد یامین ناردن ریلوے، کپل کمار اے ایل ٹی ناردن ریلوے سمیت جمعیۃ اور بھارت اسکاؤ ٹس اینڈ گائیڈس کے کئی اہم ذمہ داران شریک ہوئے۔

اس موقع پر اپنے کلیدی خطاب میں صدر جمعیۃ علماء ہند مولانا محمود اسعد مدنی نے نوجوانوں کو ملک و ملت کا مستقبل بتاتے ہوئے کہا کہ اگر وہ مضبوط ہوں گے تو ہم سب مضبوط ہوں گے، اور اگر وہ کمزور ہوں گے تو ہم سب کمزور ہو جائیں گے۔ اس لیے یہ نوجوانوں کی ذمہ داری ہے کہ وہ اپنی طاقت، صلاحیت اور کردار کو اس نہج پر لے جائیں کہ دوسروں کے لیے مثال بن سکیں۔ ہم ایسے وقت میں جی رہے ہیں جہاں چیلنجز بھی ہیں اور مواقع بھی۔ یہ وقت اپنی سوچ، عمل اور کردار کو بہتر کرنے کا ہے۔

مولانا مدنی نے کہا کہ تعلیم ہماری ترقی کی بنیاد ہیں، یہ ہم سب کی ذمہ داری ہے کہ اپنی اولاد کو بہتر انسان اور مسلمان بنانے کے لیے انہیں علم کی روشنی سے منور کریں اور ان کی اعلیٰ تربیت کریں۔ مولانا مدنی نے کہا کہ نبی اکرم صلی اللہ علیہ وسلم کی تعلیم ہے کہ ہماری زندگی دوسروں کے لیے وقف ہو۔ یہ وقت انفرادی ذمہ داریوں سے آگے بڑھ کر اجتماعی ذمہ داریوں کو نبھانے کا ہے۔ میں خاص طور پر اپنی بہنوں اور بیٹیوں کو پیغام دینا چاہتا ہوں کہ وہ علم حاصل کریں، اپنی صلاحیتوں کو پہچانیں اور معاشرے کی بہتری کے لیے کام کریں۔ انھوں نے جمعیۃ کے کارکنان و خدام سے کہا کہ قریب کے علاقہ کا کوئی محلہ اور بستی ایسی نہ رہے جہاں اس مہم کی خوشبو نہ پہنچے۔ ہمیں جمعیۃ یوتھ کلب کی اس مہم سے نوجوانوں کو زیادہ سے زیادہ جوڑ کر اس فیض کو عام کرنا ہوگا۔

مولانا مدنی نے اپنے خطاب میں یہ بھی کہا کہ نوجوانوں کو ملک و ملت کے لیے مفید بنانے کی ہماری یہ جدوجہد جاری رہے گی اور جو لوگ یہ سمجھتے ہیں کہ وہ ہمیں روک دیں گے، ان کا خواب کبھی پورا نہیں ہوگا۔ ہم نوجوانوں کو ماحولیات، صفائی اور پانی کے تحفظ جیسے اہم مسائل کے لیے تیار کر رہے ہیں۔ ہم انسانیت کی مشترکہ ذمہ داریوں کی تکمیل کے لیے کام کر رہے ہیں۔ اگر ہم اپنی ذمہ داریوں کو پوری طرح ادا نہ کر سکے تو ہماری زندگی بے معنی ہے۔

جمعیۃ علماء ہند کے جنرل سکریٹری مولانا حکیم الدین قاسمی نے اپنے خطاب میں نوجوانوں کے حوصلے اور جوش کی ستائش کی اور کہا کہ اسے خدمت خلق اور تعمیر ملت کے لیے صرف کریں۔ اس پروگرام میں بھارت اسکاؤٹس اینڈ گائیڈز کے ذمہ دارون نے بھی خطاب کیا۔ انھوں نے نوجوانوں کی پرفارمنس کی ستائش کی اور کہا کہ جمعیۃ یوتھ کلب ہماری ساری ٹیموں میں نمایاں حیثیت رکھتی ہے۔ جمعیۃ یوتھ کلب کے سکریٹری قاری احمد عبداللہ رسول پوری نے بتایا کہ جمعیۃ یوتھ کلب اس وقت 37 اضلاع میں فعال طور پر کام کر رہی ہے جس کے تحت ہنوز 28 ہزار سے زائد نوجوان تربیت پا چکے ہیں۔ انھوں نے بتایا کہ اس پروگرام کے شرکاء کو اکابر کے ناموں سے منسوب کر کے 84 ٹینٹوں کو سات زونز میں تقسیم کیا گیا تھا۔ زون نمبر 1 حضرت شیخ الہند مولانا محمود حسن دیوبندیؒ، زون نمبر 2 حضرت شیخ الاسلام مولانا حسین احمد مدنیؒ، زون نمبر 3 حضرت فدائے ملت مولانا سید اسعد مدنیؒ، زون نمبر 4 ہردے ناتھ کنجرو (یکے از بانیان بھارت اسکاوٹس)، زون نمبر 5 حضرت مجاہد ملت مولانا حفظ الرحمن سیوہارویؒ، زون نمبر 6 لارڈ بیڈن پاویل (بانی اسکاوٹنگ)، زون نمبر 7 ام المومنین حضرت خدیجتہ الکبریؓ کے ناموں سے منسوب کیا گیا۔ اسی طرح ایگزبیشن ہال کو ’مفتی کفایت اللہ ایگزبیشن‘ ہال کا نام دیا گیا۔

اس موقع پر پرفارمنس کی بنیاد پر جمعیۃ یوتھ کلب امروہہ نے پہلی پوزیشن جب کہ جمعیۃ یوتھ کلب ہاپوڑ نے دوسری پوزیشن اور جمعیۃ یوتھ کلب مظفرنگر نے تیسری پوزیشن حاصل کی جن کو صدر جمعیۃ علماء ہند مولانا محمود اسعد مدنی اور ناظم عمومی مولانا حکیم الدین قاسمی کے ہاتھوں مومنٹو اور سرٹیفکیٹ دے کر اعزاز سے نوازا گیا۔ اس موقع پر جمعیۃ یوتھ کلب بنارس کے حافظ عبید اللہ اور محمد رضوان کو شیلڈ سے نوازا گیا۔ پروگرام میں دیگر شرکاء میں ذہین احمد مدنی دیوبند، مولانا غیور قاسمی، صاحبزادہ صدر جمعیۃ علماء ہند مولانا سید حسین احمد مدنی، حافظ قاسم باغپت، مفتی اویس اکرم بجنور، حافظ فرقان اسعدی، مولانا جمال الدین قاسمی، قاری ذاکر حسین مظفر نگر اور ان کی پوری ٹیم، مولانا موسیٰ قاسمی مظفرنگر، مولانا تحسین شاملی، قاری محمد جعفر، مولانا ارشد، مولانا محمود دیوبند، حاجی محمد زید، قاری محمد جعفر کھوڈہ وغیرہ موجود رہے۔ نظامت کے فرائض جمعیۃ یوتھ کلب کے سکریٹری مولانا قاری احمد عبداللہ اور ماسٹر سلیم تیاگی نے مشترکہ طور پر انجام دیے۔ اس تقریب کے کنوینر اور سکریٹری جمعیۃ علماء اترپردیش ذہین احمد نے تمام شرکاء کا شکریہ ادا کیا۔ اس موقع پر جمعیۃ یوتھ کلب کے 28 اسٹاف اور دیگر رضاکاروں نے شب و روز محنت کی۔ ڈی او سی سلیم تیاگی اور آشکارہ خاتون کو مبارک بادی پیش کی گئی۔