فریب کرنے والوں سے دستور ہند کو خطرہ

امروہہ - آل انڈیا کانگریس کمیٹی کے 133 ویں یوم تاسیس پر پارٹی ہائی کمان کی ہدایت کے مطابق ضلع و شہر صدر کے بدست سینئر کانگریسی لیڈران کو توصیفی اسناد و اعزاز سے سرفراز کیا گیا اس موقع پر سینئر پارٹی لیڈران نے کانگریس کی تاریخ سے حاضرین کو روشناس کراتے ہوے کہا کہ پارٹی نے ہمیشہ اتحاد کی سیاست کی ہے۔

پارٹی لیڈر اور رکن پی سی سی ڈاکٹر سراج الدین ہاشمی نے کہا کہ موجودہ دور میں ملک کے در پیش مسائل کے لئے موجودہ حکومت ذمہ دار ہے بولے بی جے پی ملک کے آئین سے کھلواڑ کرتی ہے اور نفرت و توڑنے کی سیاست میں یقین رکھتی ہے انہوں نے کہا کہ بی جے پی کے دور میں دستور ہند کی حفاظت مشکل ترین کام ہو گیا ہے ۔انہوں نے بی جے پی کی عوام مخالف فیصلوں کی تنقید کرتے ہوے کہا کہ ملک کی ترقی اور عوام کی فلاح برسر اقتدار جماعت کے منصوبوں سے غائب ہیں اس کے برعکس عوام کے درمیان نفرت پیدا کرنا اور لوگوں کو ذات برادری و مذہب کے نام پر تقسیم کر امتیازی سلوک کرنا سرکار کی ترجیحات میں شامل ہیں ، ڈاکٹر ہاشمی نے مزید کہا کہ کانگریس پارٹی نے ملک کے لئے بے پناہ قربانیاں دی ہیں تاریخ شاہد ہے کہ ملک کی حفاظت اور یہاں کی گنگا جمنی تہذیب کی پاسداری کے لئے پارٹی لیڈران نے اپنی جان تک کی پرواہ نہیں کی ہے اور اپنے خون پسینہ سے ملک و یہاں کی درینہ روایات کی حفاظت کی ہے۔

اس موقع پر ضلع صدر چودھری سکھراج سنگھ و شہر صدر فیض عالم رائنی نے بھی پارٹی کارکنان کو خطاب کیا اور پارٹی کی مختصر تاریخ سے روشناس کرایا اس موقع پر پارٹی ہائی کمان کی ہدایت کے مطابق ہری سنگھ موریہ، مومراج پوار ، حاجی صلاح الدین انصاری ،جیون سنگھ، حاجی شبیہ احمد ،ڈاکٹر سراج الدین ہاشمی ،حاجی خورشید انور ،اندر پال سنگھ ، انور حسین ،نواب طارق خان ، ڈاکٹر خورشید احمد ،سردار اندرجیت سنگھ، عمر دراز سوہن لال رستوگی وغیرہ پارٹی کےمتعددسینئر لیڈران کو توصیفی اسناد و اعزاز سے سرفراز کیا گیا اس موقع پر طارق محمد خان ،حاجی خورشید انور ،سردار اندر جیت سنگھ ،چندن نقوی ، راجندر سنگھ چھابرا، عبد الملک ، ادریس احمد ، پرویز خان وغیرہ کے علاوہ کثیر تعداد میں پارٹی لیڈران و کارکنان موجود رہے۔