کل ہند مسابقات برائے طلباء مدارس 15-14 ستمبر کو

ایس آئی او آف انڈیا کی جانب سے طلباء مدارس کے لئے کل ہند مسابقات کا انعقاد 14-15 ستمبر 2018 کو علی گڑھ میں ہونے جارہا ہے۔ یہ پروگرام تفوق نام سے منعقد کیا جائے گا۔ تفوق تعلیمی بیداری اور تعلیمی ترقی کے سلسلہ کا ایک قومی سطح کا پروگرام ہے۔ یہ اسلامی علوم کے شائقین و طلباء مدارس کے لئے منعقد ہونے والا پروگرام ہے۔ اس کے ذریعہ کوشش کی جا رہی ہے کہ طلباء کی صلاحیتوں کا ارتقاء ہو اور طلباء علمی و عملی سطح پر آگے بڑھیں تاکہ سماج میں مثبت تبدیلی کی راہیں ہموار ہو سکیں۔

اس سلسلے میں آج ایک پریس کانفرنس کا انعقاد ہوا جس میں ایس آئی او کے قومی سکریٹری توصیف احمد نے موجود نامہ نگاروں سے پروگرام کی تفصیل بیان کی۔ اس پروگرام کے کنوینر اور قومی سکریٹری عبدالودود نے پروگرام کی تفصیلات بتاتے ہوئے کہا کہ ’’اس پروگرام کے تحت حفظ، تجوید ، ڈبیٹ ، مضمون نگاری اور کوئز کے مسابقات ہوں گے۔ جس میں شرکت کے لئے آن لائن اندراج 5 ستمبر 2018 تک ایس آئی او کی ویب سائٹ پر کرنا ہوگا۔ ‘‘ کنوینرنے مزید کہا کہ ’’تفوق مسابقات میں مضمون نویسی، حفظ،تجوید، کوئز اور ڈبیٹ میں اول، دوم اور سوم مقامات حاصل کرنے والے طلبہ کو بالترتیب 25000، 15000 اور 10000 روپئے نقد انعامات دیے جائیں گے۔‘‘