ترکیے زلزلہ: ملبہ سے لاشیں بھی نکل رہیں اور زندگیاں بھی، راحت رسانی کا عمل زور و شور سے جاری، دیکھیں تصویری جھلکیاں

گزشتہ 6 فروری کو ترکیے اور شام میں جو زلزلوں کے کچھ تباہناک جھٹکے آئے، اس نے دونوں ممالک کے حالات انتہائی خراب کر دیے ہیں۔ خصوصاً ترکیے میں تباہی کچھ زیادہ ہی ہوئی ہے جہاں مختلف ممالک سے امداد بڑی تعداد میں بھیجے گئے ہیں۔ ترکیے حکومت نے اس قدرتی آفت کے بعد 7 دنوں کے قومی غم کا اعلان کر دیا تھا۔ اس وقت ہر طرف تباہی کا منظر دکھائی دے رہا ہے اور مہلوکین کی تعداد صرف ترکیے میں 25 ہزار کے قریب پہنچ گئی ہے۔ اب بھی ملبوں سے لاشوں کا نکلنا جاری ہے، اور حیرت انگیز طور پر آج بھی کچھ خوش قسمت افراد کو زندہ ملبوں سے نکالا گیا۔ ترکیے انتظامیہ بیرون ممالک کی ٹیموں کے ساتھ مل کر بچاؤ اور راحت کاری کا کام تیزی کے ساتھ کر رہی ہے۔ زلزلہ متاثرین کے لیے کمبل، گرم کپڑے اور کھانے پینے کی اشیاء ہندوستان سمیت مختلف ممالک سے بھیجی گئی ہیں۔ آئیے یہاں کچھ تصویروں کے ذریعہ جانتے ہیں ترکیے کے موجودہ حالات۔