امریکہ نے ویتنام سے کچھ نہیں سیکھا اور جال میں پھنس گیا، پاکستانی صدر کا دعویٰ

روس اور یوکرین کے درمیان جاری جنگ کے پس منظر میں پاکستانی صدر ڈاکٹر عارف علوی نے حیرانی ظاہر کرتے ہوئے کہا ہے کہ امریکہ نے ماضی سے کچھ نہیں سیکھا اور ’ایک اور جال میں پھنس گیا‘۔ اس تعلق سے ’ڈان‘ کی ایک رپورٹ میں جانکاری دی گئی ہے۔ پاکستانی صدر نے جمعرات کو ’ساؤتھ ایشیا: امرجنگ اپورچونٹیز‘ موضوع پر دو روزہ بین الاقوامی سمیلن کے اختتامی اجلاس کو خطاب کرتے ہوئے کہا کہ ’’مجھے غلطی سے یقین ہو گیا تھا کہ امریکہ ویتنام جنگ سے سبق سیکھ لے گا اور کسی اور جال یا چیلنج میں نہیں پھنسے گا۔‘‘

پاکستانی صدر کا یہ تبصرہ ایسے وقت میں آیا ہے جب روس کے دو روزہ سرکاری دورے پر پاکستان کے وزیر اعظم عمران خان نے روسی صدر ولادیمیر پوتن سے ملاقات کی تھی۔ حالانکہ انھوں نے مختلف شعبوں، خصوصاً انفارمیشن ٹیکنالوجی شعبہ میں امریکہ کے ساتھ رشتے بڑھانے کی خواہش ظاہر کی۔

ڈان کی رپورٹ کے مطابق صدر علوی نے کہا کہ یوروپ نے اپنی زمین پر اور جنگ نہیں کرنے کا فیصلہ کیا ہے، لیکن افریقہ اور مشرق وسطیٰ کے دیگر ممالک کو تباہ کرنا جاری رکھا ہے۔ انھوں نے مزید کہا کہ ’’کسی بھی پولرائزیشن کی حمایت کرنے کی جگہ پاکستان انفارمیشن ٹیکنالوجی اور علاقے میں امن و ترقی کے لیے ممالک کے ساتھ کاروبار کے شعبہ میں جیت کر تعاون چاہتا ہے۔‘‘ صدر نے کہا کہ پاکستان کسی بھی پولرائزیشن کا حصہ نہیں بننا چاہتا اور ملک کے آبا و اجداد نے بھی الگ مادر وطن کے مطالبہ سے پہلے مشترکہ وجود کی وکالت کی تھی۔