پاکستان پہنچی انجو سے فاطمہ بنی ہندوستانی خاتون پر تحائف کی بارش، تاجر نے دیا قیمتی پلاٹ

اسلام آباد: ایک پاکستانی تاجر نے انجو سے فاطمہ بننے والی ہندوستانی خاتون کو ایک پلاٹ تحفے میں دیا ہے۔ اس کے ساتھ ہی مدد کے طور پر ایک چیک بھی حوالے کیا گیا ہے۔ تاہم چیک میں کتنے پاکستانی روپے درج ہیں، یہ نہیں بتایا گیا۔ دارالحکومت اسلام آباد سے صوبہ خیبرپختونخوا میں نصراللہ کے گھر تحفہ لے کر پہنچنے والے تاجر نے انجو عرف فاطمہ سے اپنی کمپنی میں نوکری دینے کا وعدہ بھی کیا ہے۔

پاک سٹار گروپ آف کمپنیز کے سی ای او محسن خان عباسی نے کہا کہ دوسرے ملک کی خاتون نے اسلام قبول کیا ہے۔ اس لیے یہ ہماری ذمہ داری ہے کہ اسے کسی قسم کی پریشانی کا سامنا نہ کرنا پڑے۔ پاکستان میں کوئی کمی محسوس نہ ہو۔

بزنس مین عباسی نے بتایا کہ ان کی پاک سٹی کمپنی رئیل اسٹیٹ کے شعبے میں کام کرتی ہے۔ ہمارے بورڈ ممبران نے فیصلہ کیا کہ انجو عرف فاطمہ کو اس کے گھر کے لیے شہر میں 10 مرلہ (272.251 مربع فٹ) پلاٹ دیا جائے۔ اس کے ساتھ جیسے ہی پاکستان میں ہندوستانی خاتون کی دستاویزات کا قانونی عمل مکمل ہوگا پاک اسٹار گروپ انہیں نوکری بھی دے گا۔ فی الحال اسے گھر بیٹھے تنخواہ ادا کی جائے گی۔

صوبہ خیبر پختونخوا کے ضلع اپر دیر پہنچنے والے تاجر عباسی نے اسلام میں داخل ہونے پر عیسائی خاتون انجو کا پرتپاک استقبال کیا۔ انہوں نے پاکستانی حکومت سے انجو اور نصراللہ کے خاندان کی حمایت کرنے کی بھی اپیل کی۔

صرف اتنا ہی نہیں بزنس مین عباسی نے پاکستان کے دیگر امرا سے بھی درخواست کی کہ وہ انجو کو تحائف دیں۔ انہوں نے کہا کہ پاکستان میں بہت پیسے والے لوگ ہیں، انہیں مدد کے لیے آگے آنا چاہیے۔

محسن خان عباسی کا مزید کہنا تھا کہ ہندوستان سے اپنا گھر اور خاندان چھوڑ کر پاکستان آئیں اور مسلمان بنی انجو عرف فاطمہ کو بہتر محسوس کرایا جائے تاکہ انجو کے نقش قدم پر چلتے ہوئے دوسرے لوگ بھی حلقہ اسلام میں داخل ہوں۔ پاکستان کے ذمہ داروں سے گزارش ہے کہ وہ اسے کبھی یہ محسوس نہ ہونے دیں کہ وہ کس دوسرے ملک میں آئی ہے، یا اسے ایسا نہیں لگنا چاہئے کہ وہ کس مذہب میں آ گئی، جہاں اس کا کوئی نہیں ہے۔