مسجد نبویؐ کا تقدس پامال کرنے کا معاملہ، 6 پاکستانی شہریوں کو سزا

اسلام آباد: پاکستان کے وزیر اعظم شہباز شریف کے دورہ سعودی عرب کے دوران مدینہ منورہ میں مسجد نبویؐ کے تقدس کو پامال کرنے کے الزام میں 6 پاکستانی شہریوں کو مجرم قرار دیتے ہوئے 8 سے دس سال قید کی سزا سنائی گئی ہے۔ جیو نیوز نے یہ اطلاع سفارتی ذرائع کے حوالے سے اپنی رپورٹ میں دی۔

خیال رہے کہ اپریل میں پاکستانی وزیر اعظم شہباز شریف کے دورہ سعودی عرب کے دوران مدینہ منورہ میں مسجد نبویؐ کے تقدس کی خلاف ورزی کی گئی تھی۔ مظاہرہ کرنے والے لوگوں کا تعلق مبینہ طور پر پی ٹی آئی سے تھا۔ وزیراعظم شہباز شریف اور ان کے وفد کی مسجد آمد پر مظاہرین نے نعرے بازی شروع کر دی، چور، چور کہہ کر چلانے لگے۔ اس دوران مریم اورنگزیب کو بھی ہراساں کیا گیا اور قابل اعتراض نعرے لگائے گئے۔ اس واقعے کی ویڈیو سوشل میڈیا پر وائرل ہو گئی تھی۔

رپورٹ کے مطابق مدینہ منورہ کی عدالت نے 3 پاکستانی شہریوں انس، ارشاد اور محمد سلیم کو 10-10 سال قید کی سزا سنائی۔ جبکہ 3 دیگر خواجہ لقمان، محمد افضل اور غلام محمد کو 8 سال قید کی سزا سنائی گئی ہے۔ اس کے علاوہ قصورواروں پر 20-20 ہزار سعودی ریال کا جرمانہ عائد کرنے کے ساتھ ہی ان کے موبائل فون بھی ضبط کر لیے گئے ہیں۔

مظاہرین نے جے ڈبلیو پی کے سربراہ اور وفاقی وزیر برائے نارکوٹکس کنٹرول شاہ زین بگٹی کے ساتھ بھی بدتمیزی کی اور ان کے بال کھینچے۔ مظاہرین اپنے موبائل فونز سے اس پورے واقعہ کی فلم بندی کی تھی۔

واقعے کے بعد سیاسی و مذہبی رہنماؤں اور سماج کے مختلف طبقوں سے تعلق رکھنے والے افراد نے بھی واقعے پر شدید غم و غصے کا اظہار کرتے ہوئے مسجد نبویؐ میں سیاسی نعرے بازی کی شدید مذمت کی تھی۔