پاکستان: کوئٹہ ریلوے اسٹیشن دھماکہ کی خوفناک ویڈیو آئی سامنے، اب تک 27 ہلاکتوں کی تصدیق

پاکستان کے بلوچستان علاقہ واقع کوئٹہ ریلوے اسٹیشن پر ہفتہ کی صبح ہوئے زوردار دھماکے میں ہلاکتوں کی تعداد بڑھ کر 27 ہو گئی ہے اور کم از کم 62 افراد زخمی بھی بتائے جا رہے ہیں۔ مہلوکین کی تعداد میں مزید اضافہ ہو سکتا ہے۔ اس درمیان اس دھماکہ کی خوفناک ویڈیو سامنے آئی ہے۔ ’اسپوتنک انڈیا‘ نے سوشل میڈیا پلیٹ فارم ’ایکس‘ پر ایک ویڈیو پوسٹ کی ہے جس میں دھماکہ ہوتے ہوئے دکھایا گیا ہے۔ یہ سی سی ٹی وی میں قید ویڈیو ہے اور بتایا جا رہا ہے کہ دھماکہ کا مقصد پاکستانی فوج کو ہدف بنانا تھا۔

اس درمیان کوئٹہ کے سینئر پولیس سپرنٹنڈنٹ محمد بلوچ کا ایک بیان سامنے آیا ہے جس میں بتایا گیا ہے کہ دھماکہ میں پاکستانی فوجی جوانوں کی شہادت بڑی تعداد میں ہوئی ہے۔ انھوں نے کہا کہ جن 27 لوگوں کی موت سے متعلق تصدیق ہوئی ہے، ان میں پاکستانی فوج کے 14 جوان شامل ہیں۔ اس سے ظاہر ہوتا ہے کہ حملہ آوروں کا نشانہ پاکستانی فوجی ہی تھے۔

جو سی سی ٹی وی فوٹیج سوشل میڈیا پر سامنے آیا ہے اس میں صاف دیکھا جا سکتا ہے کہ پلیٹ فارم پر سینکڑوں لوگ ٹرین کا انتظار کر رہے ہیں۔ اچانک زوردار دھماکہ ہوتا ہے اور افرا تفری مچ جاتی ہے۔ دھماکہ اس قدر زوردار ہے کہ اسٹیشن کی چھت اڑ جاتی ہے اور پلیٹ فارم پر لاشیں بکھر جاتی ہیں۔

کوئٹہ کے ایس ایس پی محمد بلوچ کا کہنا ہے کہ دھماکہ ریلوے اسٹیشن کے اندر تب ہوا جب پیشاور جانے والی ایکسپریس اپنی منزل کے لیے روانہ ہونے والی تھی۔ انھوں نے یہ بھی بتایا کہ اس دھماکہ کی ذمہ داری بلوچ لبریشن آرمی نے لے لی ہے۔ بلوچ لبریشن آرمی کا کہنا ہے کہ حملے میں جعفر ایکسپریس ٹرین میں سوار فوجی اہلکاروں کو نشانہ بنایا گیا، کیونکہ وہ اسٹیشن چھوڑنے کی تیاری کر رہی تھی۔