پاکستان کی غربت سے عمران ہوئے پریشان، کہا ’اس طرح نہیں ہو پائے گی ترقی‘

پاکستان کی غریبی اور بڑھتی ہوئی مہنگائی اس وقت پوری دنیا میں موضوعِ بحث ہے۔ ٹماٹر کی قیمت 300 روپے کلو سے زیادہ ہونے کی خبروں نے تو ہندوستانی میڈیا میں بھی خوب سرخیاں بٹوری ہیں۔ پاکستان کی اس غربت کی وجہ سے پی ایم عمران خان بھی بہت پریشان نظر آ رہے ہیں۔ بدھ کے روز اس سلسلے میں انھوں نے مایوسی بھرا ایک بیان دیا جس میں کہا کہ ’’آج کل جس طرح سے ملک چلایا جا رہا ہے اس طریقے سے پاکستان کبھی ترقی نہیں کر پائے گا۔‘‘ یہ بیان انھوں نے ملک میں ہو رہے کم ٹیکس کلیکشن کے پیش نظر دیا ہے۔

پاکستانی میڈیا نے پی ایم عمران خان کے اس بیان کو نشر کیا ہے جس میں بتایا گیا ہے کہ بدھ کے روز وزیر اعظم دفتر میں مرکزی ریونیو بورڈ کے افسروں سے خطاب کے دوران مذکورہ باتیں کہیں۔ خطاب کے دوران عمران خان نے پاکستان میں گھٹتے ٹیکس پر فکر کا اظہار کیا اور انھوں نے ایف بی آر کی اعلیٰ قیادت کو پاکستان ریونیو اتھارٹی میں بدلنے کے منصوبہ پر تبادلہ خیال کیا۔ انھوں نے کہا کہ بغیر ان سے صلاح و مشورہ کے کوئی بھی ایکشن پلان نافذ نہیں کیا جائے گا۔

دراصل پاکستان میں لوگ ٹیکس جمع کرنے میں بہت پیچھے رہتے ہیں۔ ایسے ماحول میں سرکاری خزانہ لگاتار گھٹتا ہی جا رہا ہے۔ عمران خان نے اس پر مایوسی ظاہر کرتے ہوئے کہا کہ اگر خزانہ بڑھانے کے معاملے میں جلد کوئی قدم نہیں اٹھایا گیا تو ملک کو مستقبل میں سنگین معاشی حالات سے گزرنا پڑ سکتا ہے۔

پاکستان نے 20-2019 کے دوران 5.5 لاکھ کروڑ روپے کی ٹیکس وصولی کا ہدف رکھا ہے۔ اس کے بارے میں پی ایم عمران خان نے کہا کہ 8 لاکھ کروڑ روپے کی ٹیکس وصولی کا ہدف کوئی مشکل کام نہیں ہے۔ لوگوں کو اسے اپنی قومی ذمہ داری سمجھنی ہوگی۔ انھوں نے کہا کہ اگر لوگوں کو یہ یقین ہو جائے کہ ان کے ذریعہ دیا گیا ٹیکس لیڈروں کی زندگی بدلنے کی جگہ فلاحی کاموں میں خرچ ہوگا ، تو شاید وہ ٹیکس بھرنے لگیں۔

قابل ذکر ہے کہ حکومت پاکستان نے بدھ کو کہا کہ وہ ٹماٹر کی آسمان چھوتی قیمتوں کو کنٹرول کرنے کے لیے ایران سے ٹماٹر درآمد کرے گا۔ پاکستان میں اس وقت ٹماٹر کی قیمت 300 روپے کلو تک پہنچ گئی ہے۔ ہندوستان سے درآمد بند ہونے کے بعد اور پاکستان میں ٹماٹر سمیت کئی چیزوں کی قیمتیں کافی بڑھ گئی ہیں۔