پاکستان: عمران خان کی نیشنل اسمبلی رکنیت چھینے جانے کے بعد انتخابی کمیشن دفتر کے باہر فائرنگ

پاکستان میں ’پاکستان تحریک انصاف‘ (پی ٹی آئی) پارٹی کو اس وقت زوردار جھٹکا لگا جب سابق وزیر اعظم عمران خان کی نیشنل اسمبلی رکنیت ختم کر دی گئی۔ ساتھ ہی عمران خان کو پانچ سال کے لیے انتخاب لڑنے پر نااہل قرار دے دیا گیا ہے۔ یعنی انتخابی کمیشن نے انھیں الیکشن لڑنے سے محروم کر دیا ہے۔ اس فیصلہ کے بعد انتخابی کمیشن دفتر کے باہر فائرنگ کا واقعہ سامنے آیا ہے۔ حالانکہ یہ پتہ نہیں چل سکا ہے کہ یہ فائرنگ کس نے کی۔ اس واقعہ میں کسی کے ہلاک یا زخمی ہونے کی اطلاع فی الحال نہیں ملی ہے۔

اس درمیان عمران خان کے حامیوں نے سڑکوں پر نکل کر احتجاجی مظاہرہ شروع کر دیا ہے۔ اسلام آباد ایکسپریس وے کو بلاک کر دیا گیا ہے اور عمران خان کے حامی اسلام آباد ایکسپریس وے کے قریب اقبال ٹاؤن میں مظاہرہ کر رہے ہیں۔ اس احتجاجی مظاہرہ کو دیکھتے ہوئے پولیس نے آنسو گیس کے گولے داغے ہیں تاکہ بھیڑ کو منتشر کیا جا سکے۔

دراصل انتخابی کمیشن نے توشہ خانہ معاملے میں عمران خان کو قصوروار ٹھہرایا ہے۔ کمیشن نے اس معاملے میں 19 ستمبر کو اپنا فیصلہ محفوظ رکھ لیا تھا۔ عمران خان کے بدعنوانی کا قصوروار پائے جانے کے بعد ان کے خلاف احتجاج بھی شروع ہو گیا ہے۔ حریف پارٹی کے کارکنان بھی سڑکوں پر اتر آئے ہیں۔

قابل ذکر ہے کہ پاکستان کے چیف الیکشن کمشنر سکندر سلطان رضا کی صدارت والی چار رکنی بنچ نے عمران خان کی نیشنل اسمبلی رکنیت کو لے کر فیصلہ سنایا ہے۔ فیصلے کے بعد انتخابی کمیشن کے دفتر کی سیکورٹی بڑھا دی گئی، لیکن اس کے باوجود انتخابی کمیشن دفتر کے باہر فائرنگ کا واقعہ پیش آیا۔