کیڑوں نے پاکستان کی ناک میں کیا دَم، پی ایم عمران نے اٹھایا بڑا قدم

مختلف طرح کے مسائل سے نبرد آزما پاکستان کے سامنے ایک نئی پریشانی آ گئی ہے جو پی ایم عمران خان کے لیے دردِ سر بن گیا ہے۔ پریشانی کا سبب کوئی ملک یا معاشی حالت نہیں بلکہ ایک کیڑا ہے جس نے حکومت پاکستان کو کچھ بڑے اقدام کرنے پر مجبور کر دیا ہے۔ دراصل پاکستان کی چار ریاستوں میں ’ٹڈی‘ نے کہرام مچا رکھا ہے اور عام لوگوں سے لے کر عمران خان تک ٹڈیوں کی فوج سے پریشان ہیں۔

میڈیا ذرائع سے موصول ہو رہی خبروں کے مطابق پاکستانی حکومت نے ٹڈی کی بڑھتی تعداد کو کنٹرول میں کرنے کے لیے ہوائی جہاز سے اینٹی ٹڈی اسپرے کیا اور پھر حکومت نے میر پور ضلع کے ائیر پورٹ پر کئی جہاز بھی اس مقصد سے تعینات کیے ہیں۔ ان سب کے باوجود ٹڈی فوج کا کہرام برقرار ہے۔ مسئلہ اس قدر سنگین ہو گیا ہے کہ پاکستان کے مناباؤ میں گزشتہ بدھ کی صبح ہند-پاک ٹڈی کنٹرول تنظیم کے افسران کے درمیان تقریباً 4 گھنٹے کی میٹنگ ہوئی۔

وزیر اعظم عمران خان بھی اس معاملے کو کافی سنجیدگی سے لے رہے ہیں۔ یہی سبب ہے کہ انھوں نے تین دن قبل ہی سنٹرل فوڈ سیکورٹی ریسرچ کے وزیر کو میر پور بھیجا اور مسئلہ کا حل تلاش کرنے کی سمت میں قدم بڑھانے کی ہدایت دی۔ بتایا جا رہا ہے کہ ٹڈیوں کی وجہ سے پاکستان میں فصلیں برباد ہو رہی ہیں اور کسانوں کو کافی نقصان کا سامنا کرنا پڑ رہا ہے۔

قابل غور بات یہ ہے کہ مانسون آنے والا ہے اور بارش و تیز آندھی کا بھی اندیشہ ظاہر کیا جا رہا ہے۔ اس کے پیش نظر ہندوستان بھی فکر مند ہے کیونکہ ہوا کی سمت اگر ہندوستان کی جانب ہوگی تو ٹڈیوں کی فوج راجستھان کی طرف بڑھ سکتی ہے۔ یہی سبب ہے کہ ہندوستان نے ٹڈیوں سے نمٹنے کے لیے پہلے ہی تیار کر رکھی ہے۔ کچھ دن قبل راجستھان کے جیسلمیر میں بڑی تعداد میں ٹڈی دیکھے بھی گئے تھے، لیکن فی الحال ہندوستان کو اتنی پریشانی لاحق نہیں ہے جس سے پاکستان نبرد آزما ہے۔