عمران خان کو بنایا گیا شیو دیوتا، پاکستان میں ہنگامہ

پاکستان میں تحریک انصاف پارٹی کے سربراہ عمران خان کو شیو دیوتا کے روپ میں دکھائے جانے پر ہنگامہ ہو گیا ہے۔ لوگ پارلیمنٹ سے سڑک تک مظاہرہ کر رہے ہیں ۔ پاکستانی ہندوؤں نے اسے ہندؤں کے جذبات سے کھلواڑ قرار دیتے ہوئے کارروائی کا مطالبہ کیا ہے۔

شیو کے روپ والی عمران خان کی تصویر سوشل میڈیا پر وائرل ہو رہی ہے۔ تصویر کو سنجیدگی سے لیتے ہوئے پاکستانی پارلیمنٹ نے بھی اس کی تحقیقات مرکزی تحقیقاتی ایجنسی (ایف آئی اے) کو سونپ دی ہے۔ سوشل میڈیا پر شیودیوتا کے روپ میں دکھائے جانے میں نواز شریف کی پارٹی مسلم لیگ (ن) کا ہاتھ بتایا جا رہا ہے۔

قومی اسمبلی کے سپیکر ایاز صادق نے پاکستان تحریک انصاف کے چیئرمین عمران خان کو بطور ہندو دیوتا پیش کرنے کا معاملہ ایف آئی اے کے سپرد کر دیا۔ بدھ کے روز قومی اسمبلی کے اجلاس میں پیپلز پارٹی کے رکن رمیش لال نے نکتہ اعتراض پر کہا کہ مسلم لیگ (ن) کے کارکنوں نے سوشل میڈیا پر عمران خان کی ایک تصویر پوسٹ کی ہے جس میں عمران خان کو شیو دیوتا کے روپ میں پیش کیا گیا ہے۔ اسپیکر نے وزیر مملکت داخلہ طلال چودھری سے کہا کہ وہ سات دن کے اندر رپورٹ ایوان میں پیش کریں۔ رمیش لال نے کہا کہ عمران خان کی مخالفت میں حکمراں جماعت کے کارکنوں نے ہندوﺅں کے مذہبی جذبات کو ٹھیس پہنچائی ہے۔

پاکستان میں اقلیتی طبقہ سے وابستہ سماجی کارکن کپل دیو کا کہنا ہے کہ ان کی مقدس ہستیوں اور عبادت گاہوں کا احترام کیا جائے اور اس حوالے سے جامع اور مؤثر قانون سازی کی جائے۔

ادھر سوشل میڈیا پر بھی ہندوؤں نے اس کی مذمت کی ہے۔ پشاور کے رہائشی ہندو کیدارناتھ نے اس واقعہ پر اعتراض کرتے ہوئے ٹوئٹ کیا ’’اگر ہم پاکستان میں برابر کے شہری ہیں تو یہ کیا ہے؟ یہ اسلام میں تو نہیں ہے۔ ہم اس کے خلاف کارروائی چاہتے ہیں۔ ہم پاکستانی ہیں لیکن سب سے پہلے ہم ہندو ہیں۔ اس فیس بک پیج کے خلاف ایکشن لیا جانا چاہئے۔ ‘‘