عمران خان کی پارٹی ’پی ٹی آئی‘ کو پیشاور ہائی کورٹ نے دیا جھٹکا، نہیں ملے گا ’بلّا‘ کا انتخابی نشان!

عمران خان اور ان کی پارٹی ’پاکستان تحریک انصاف‘ (پی ٹی آئی) کو آج پیشاور ہائی کورٹ نے زوردار جھٹکا دیا۔ پیشاور ہائی کورٹ کے جسٹس اعجاز خان نے پی ٹی آئی سے متعلق انٹرا پارٹی الیکشن اور انتخابی نشان کیس کو لے کر الیکشن کمیشن کا فیصلہ بحال کرتے ہوئے حکم امتناع واپس لے لیا ہے۔ آج عدالتی فیصلے کے خلاف الیکشن کمیشن کی نظر ثانی اپیل پر پیشاور ہائی کورٹ میں سماعت ہوئی جہاں الیکشن کمیشن کے وکیل اور پاکستان تحریک انصاف کے سینئر وکیل قاضی انور ایڈوکیٹ عدالت میں پیش ہوئے۔

آج معاملے پر سماعت کے شروع میں ہی پی ٹی آئی کے وکیل قاضی انور نے سوال کیا کہ کیا الیکشن کمیشن ہائی کورٹ کے فیصلے کے خلاف عدالت آ سکتا ہے؟ قاضی انور نے کہا کہ ان کی عرضی ٹھیک نہیں ہے، 26 دسمبر کو فیصلہ آیا، اس پر ابھی تک عمل نہیں کیا گیا۔ الیکشن کمیشن نےاب تک ویب سائٹ پر انٹرا پارٹی انتخابات سرٹیفکیٹ جاری نہیں کیا۔

ایک پاکستانی میڈیا رپورٹ کے مطابق جسٹس اعجاز نے استفسار کیا کہ کیا آپ کی جانب سے کوئی توہین عدالت کیس آیا؟ اس پر قاضی انور نے  کہا کہ ہمارے امیدواروں کے کاغذات نامزدگی مسترد ہوئے، الیکشن کمیشن نے کیا کیا؟ الیکشن کمیشن کو ویب سائٹ پر سرٹیفکیٹ ڈالنے میں کیا مسئلہ ہے؟ ایک پارٹی کو الگ تھلگ کرنا الیکشن کمیشن اور جمہوریت کے لیے ٹھیک نہیں۔ الیکشن کمیشن کو ایک سیاسی جماعت کے خلاف استعمال نہیں کرنا چاہیے تھا، ہم چاہتے ہیں کہ الیکشن کمیشن شفاف انتخابات کروائے۔

اس سماعت کے دوران الیکشن کمیشن کی طرف سے پیش وکیل نے 26 دسمبر کو الیکشن کمیشن کی بات سنے بغیر عدالت کے حکم امتناع جاری کرنے پر اعتراض اٹھایا۔ پھر عدالت نے فریقین کے دلائل مکمل ہونے کے بعد الیکشن کمیشن کی نظر ثانی اپیل پر فیصلہ محفوظ کر لیا۔ چند گھنٹوں بعد فیصلہ سناتے ہوئے الیکشن کمیشن کی نظر ثانی اپیل منظور کر لی گئی اور الیکشن کمیشن کا 22 دسمبر کا فیصلہ بحال کر دیا گیا۔ اس فیصلے کے بعد پی ٹی آئی سے ایک بار پھر بلّے کا انتخابی نشان چھن گیا ہے۔