پاکستان: عمران خان وزیر اعظم نامزد، حلف برداری کی تاریخ طے نہیں

پاکستان تحریک انصاف (پی ٹی آئی) پارلیمانی کمیٹی کی میٹنگ میں آج یعنی 6 اگست کو عمران خان متفقہ طور پر وزیر اعظم نامزد کر لیے گئے۔ پی ٹی آئی رہنما شاہ محمود قریشی نے اس سلسلے میں قرار داد پیش کی جس کے بعد سبھی نے متفقہ طور پر عمران کے لیے پارلیمانی قائد بننے کی راہ ہموار کر دی۔ وزیر اعظم عہدہ کے لیے نامزد کیے جانے کے بعد تمام اراکین نے کھڑے ہو کر پی ٹی آئی چیئرمین کو مبارکباد پیش کی اور تالیاں بجائیں۔

اسلام آباد کے ایک پرائیویٹ ہوٹل میں پی ٹی آئی کے ذریعہ پارلیمانی کمیٹی کی میٹنگ ہوئی جس میں عمران خان کو وزیر اعظم نامزد کرنے کے علاوہ بھی کئی معاملوں پر غور و خوض ہوا۔ اس درمیان عمران اس عہدہ کے لیے حلف کس دن لیں گے اس تعلق سے کوئی حتمی فیصلہ نہیں ہوا۔ حالانکہ عمران خان نے گزشتہ دنوں خود یہ بات کہی تھی کہ وہ 11 اگست کو حلف لیں گے۔ اس لیے امکان ظاہر کیا جا رہا ہے کہ 11 اگست کو ہی حلف برداری تقریب ہوگی اور اس کا باضابطہ اعلان بھی جلد ہی کیا جائے گا۔ کچھ لوگوں کا یہ بھی کہنا ہے کہ عمران خان 14 اگست کو بھی حلف لے سکتے ہیں کیونکہ 14 اگست پاکستان کی یومِ آزادی کی تاریخ بھی ہے۔

پارٹی کی جانب سے وزیر اعظم عہدہ کے لیے نامزد کیے جانے کے بعد عمران خان نے ان سبھی لوگوں کا شکریہ ادا کیا جنھوں نے ان پر بھروسہ کیا۔ ساتھ ہی انھوں نے کہا کہ ’’مجھ پر آج سب سے بڑی ذمہ داری آن پڑی ہے۔ عوام تبدیلی کے لیے گھروں سے نکلے اور اپنا فیصلہ سنایا۔ ہم ان کے بھروسے پر کھرا اترنے کی بھرپور کوشش کریں گے۔‘‘ وزیر اعظم نامزد ہونے کے بعد عمران خان نے پارٹی لیڈروں کو عوامی مفادات کے تئیں بیدار رہنے سے متعلق کئی گائیڈ لائنس بھی دیے۔

پارٹی رہنما شاہ محمود قریشی نے پارلیمانی کمیٹی کے اجلاس کے بعد میڈیا سے خطاب کیا اور میٹنگ میں ہوئی کئی باتیں ان کے سامنے رکھیں۔ انھوں نے کہا کہ ’’ہم عددی لحاظ سے مرکز میں حکومت بنانے کے قابل ہو چکے ہیں اور اب ہماری پہلی ترجیح پاکستان ہے۔‘‘ پاکستان کے ہونے والے وزیر اعظم عمران خان کا تذکرہ کرتے ہوئے شاہ محمود قریشی نے کہا کہ ’’عمران توقع کرتے ہیں کہ پارٹی متحد ہو کر آگے بڑھے گی۔ آنے والے دنوں کے چیلنجز پر انھوں نے پارٹی کو اعتماد میں لیا اور مضبوطی سے آگے بڑھنے کی تلقین کی۔‘‘

محمود قریشی نے میڈیا سے بات چیت کرتے ہوئے کہا کہ ’’عمران صاحب پاکستان کے عوام کی فلاح و خوشحالی کے لیے کمر بستہ ہیں اور وہ جانتے ہیں کہ ٹیکس کی حفاظت کس طرح کرنی ہے اور ان کا استعمال کہاں کرنا ہے۔ عمران صاحب اپنی ذمہ داریوں کو نبھانے کے لیے پرعزم بھی ہیں اور پارلیمنٹ میں ہر سوال کا جواب بھی دیں گے۔‘‘