پاکستان میں زوردار ہنگامہ، سابق وزیر اعلیٰ کے گھر بکتر بند گاڑیوں کے ساتھ پہنچی پولیس، 11 افراد گرفتار

پاکستان میں سیاسی ہنگامہ تھمنے کا نام نہیں لے رہا ہے۔ ایک طرف سابق وزیر اعظم عمران خان اپنے اوپر گرفتاری کی لٹکتی تلوار کو لے کر سرخیوں میں ہیں، اور دوسری طرف پاکستان کے پنجاب خطہ کے سابق وزیر اعلیٰ چودھری پرویز الٰہی کے خلاف پولیس نے سخت کارروائی کی ہے۔

میڈیا رپورٹس کے مطابق لاہور میں جمعہ اور ہفتہ کی درمیانی شب زوردار ہنگامہ والا ماحول دیکھنے کو ملا۔ عمران خان کی پارٹی پی ٹی آئی (پاکستان تحریک انصاف) کے کارگزار صدر اور پنجاب کے سابق وزیر اعلیٰ چودھری پرویز الٰہی کے گھر میں پولیس دروازہ توڑ کر زبردستی گھس گئی۔ بدعنوانی کے کیس کا سامنا کر رہے پرویز الٰہی کو گرفتار کرنے پہنچی پولیس نے بکتر بند گاڑیوں سے گھر کا دروازہ توڑنے کی بھی کوشش کی۔

بتایا جاتا ہے کہ لاہور کے ظہور الٰہی روڈ علاقہ میں موجود پرویز الٰہی کے گھر میں داخل ہونے کے لیے پولیس اور اینٹی کرپشن کی ٹیم بکتر بند گاڑیوں کے ساتھ پہنچی تھی۔ صدر دروازہ سے گھسنے کے بعد پولیس نے پرویز الٰہی کے گھر کا دروازہ بھی لات مار کر توڑ دیا۔ حالانکہ پرویز الٰہی پولیس کے ہاتھ نہیں لگے، لیکن ان کے اہل خانہ اور اسٹاف کے 11 لوگوں کو گرفتار کر لیا گیا ہے۔

واضح رہے کہ چودھری پرویز الٰہی پر 12 کروڑ روپے کے گھوٹالے کے الزام میں مقدمہ درج ہے۔ اسی معاملے میں ان کی ضمانت کی میعاد ختم ہو رہی تھی جسے عدالت نے آگے بڑھا دیا، لیکن اس کے باوجود پولیس پرویز الٰہی کو پکڑنے کے لیے ان کے گھر میں گھس گئی۔ اس کارروائی کی عمران خان نے شدید الفاظ میں مذمت کی ہے۔ انھوں نے ایک ٹوئٹ کیا ہے جس میں لکھا ہے کہ ’’پرویز الٰہی کے گھر پر چھاپہ ماری کی سخت مذمت کرتا ہوں۔ گھر میں موجود خواتین اور گھر والوں تک کا احترام نہیں کیا گیا۔ ہم اپنی آنکھوں کے سامنے پاکستان میں جمہوریت کو ختم ہوتا دیکھ رہے ہیں۔‘‘ انھوں نے مزید کہا کہ یہاں آئین، سپریم کورٹ کے فیصلوں یا لوگوں کے بنیادی حقوق کا کوئی احترام نہیں ہے۔ صرف جنگل اور فاشزم کا قانون ہے۔