پاکستان کے شہر ہرنائی میں شدید زلزلہ، 20 افراد ہلاک، متعدد زخمی

اسلام آباد: پاکستان کے صوبہ بلوچستان کے علاقے ہرنائی میں آج صبح تقریباً 03.30 بجے آنے والے شدید زلزلے میں کم از کم 20 افراد ہلاک ہو گئے ہیں اور 150 سے زائد افراد کے زخمی ہونے کی اطلاعات ہیں۔ متاثرہ علاقے میں امدادی کارروائیاں جاری ہیں۔

وہیں، بلوچستان کے ڈی جی ہیلتھ سروسز ڈاکٹر ناصر علی بگٹی نے کہا کہ اب تک 200 سے زائد زخمیوں کو علاج فراہم کیا گیا ہے جبکہ 9 ایسے مریض جن کی حالت تشویشناک ہے اور انہیں بذریعہ ہیلی کاپٹر کوئٹہ منتقل کیا گیا ہے۔ ان میں چار خواتین، 2 بچے اور 3 مرد شامل ہیں۔ زلزلے کی وجہ سے پانچ بچے بھی ہلاک ہوئے ہیں۔

رپورٹ کے مطابق ہرنائی شہر اور دیگر علاقوں میں زلزلے کے سبب متعدد مکانات کو بھی نقصان پہنچ ہے اور ملبے سے لوگوں کو نکالنے کا سلسلہ جاری ہے۔ زلزلے سے 100 سے زیادہ کچے مکانات منہدم ہونے کی اطلاع ہے۔ زلزلہ پیما مرکز کے مطابق زلزلے کی شدت ریکٹر سکیل پر پانچ اعشاریہ نو تھی جبکہ زمین میں اس کی گہرائی پندرہ کلومیٹر تھی۔ زلزلے کا مرکز بلوچستان کے علاقے ہرنائی کے قریب تھا۔

بلوچستان کے وزیر داخلہ میر ضیا اللہ لانگو نے بتایا کہ زلزلے کی وجہ سے ہرنائی میں بڑے پیمانے پر نقصان ہوا ہے اور ضلع میں ایمرجنسی نافذ کر کے امدادی سرگرمیوں کا آغاز کر دیا گیا ہے۔ وزیر داخلہ نے بتایا کہ قدرتی آفات سے نمٹنے کے صوبائی ادارے پی ڈی ایم اے کو متحرک کرکے ہیوی مشینری ہرنائی کے لیے روانہ کردی گئی ہے۔

ہرنائی میں مقامی صحافی یزدانی ترین نے بتایا ہے کہ زلزلے کے جھٹکے بہت شدید تھے۔ ان کا کہنا تھا کہ ہرنائی شہر اور اس کے نواحی علاقوں میں گھروں کو شدید نقصان پہنچا ہے۔