’ہم اور مضبوط ہوں گے‘، حماس کے نئے چیف ڈاکٹر خلیل الحیۃ نے اسرائیل کو دیا مضبوط جواب

حماس کے سربراہ یحییٰ سنوار کے انتقال کی تصدیق اسرائیل کے بعد حماس نے بھی کر دی ہے۔ حماس کے نئے چیف کا نام بھی سامنے آ گیا ہے اور انھوں نے ایک ویڈیو پیغام میں حماس کے مزید مضبوط ہونے کا عزم ظاہر کیا ہے۔ نئے چیف کا نام ڈاکٹر خلیل الحیۃ ہے، جنھوں نے یحییٰ سنواری کے انتقال کی تصدیق کرتے ہوئے کہا کہ ’’ہم اور مضبوط ہوں گے۔‘‘ اس کے ساتھ ہی ڈاکٹر خلیل نے اسرائیل کی طرف سے جنگ بندی کی اس پیشکش کو بھی ٹھکرا گیا ہے جس میں کہا گیا تھا کہ اگر سبھی یرغمالوں کو آزاد کیا گیا تو حملے بند کر دیے جائیں گے۔

ڈاکٹر خلیل الحیۃ کی جو ویڈیو سامنے آئی ہے اس میں وہ کہتے ہوئے دکھائی دے رہے ہیں کہ 7 اکتوبر کو اسرائیل پر ہوئے حملے میں پکڑے گئے اسرائیلی یرغمالوں کو اس وقت تک آزاد نہیں کیا جائے گا جب تک کہ گھیرے ہوئے فلسطینی انکلیو پر حملہ بند نہیں ہو جاتا اور اسرائیلی فوج واپس نہیں ہو جاتی۔ انھوں نے کہا کہ ’’غزہ پر حملہ ختم ہونے اور غزہ سے (فوج کی) واپسی ہونے سے پہلے وہ قیدی آپ کے پاس واپس نہیں آئیں گے۔‘‘ ساتھ ہی انھوں نے یہ بھی کہا کہ ’’موت ’قبضہ کرنے والوں کے لیے لعنت‘ بن جائے گی۔‘‘

قابل ذکر ہے کہ حماس کی ٹاپ لیڈرشپ کے کئی اہم اراکین اسرائیل کے تازہ حملوں میں ہلاک ہو چکے ہیں۔ یحییٰ سنوار کے انتقال کی خبر سامنے آنے کے بعد خالد میشال کو حماس کا سربراہ بنائے جانے کا امکان ظاہر کیا جا رہا تھا۔ حالانکہ اب یہ واضح ہو چکا ہے کہ نئے چیف ڈاکٹر خلیل الحیۃ بنائے گئے ہیں۔ وہ فی الحال قطر میں مقیم ہیں۔ 2007 میں اسرائیل کے ذریعہ غزہ میں جو ایئر اسٹرائیک کیا گیا تھا، اس میں ڈاکٹر خلیل کا پورا کنبہ ہلاک ہو گیا تھا۔