افغانستان: دو مساجدپر حملوں میں 72 افراد ہلاک

کابل: افغانستان میں د و خود کش حملوں میں کم سے کم 72لوگوں کی موت ہوگئی ہے۔ میڈیا رپورٹوں کے مطابق حملہ آوروں نے جمعہ کی شام دو مساجد کو نشانہ بنایا۔

پہلا واقعہ راجدھانی کابل میں پیش آیا جہاں ایک حملہ آور امام ضامن مسجد میں داخل ہوا، جو دارالحکومت کے مغربی تشتی بارچی علاقے میں واقع ہے، جہاں اُس نے اپنے جسم سے بندھے بارود کو دھماکے سے اُڑا دیا۔ اس حادثہ میں40افراد مارے گئے۔

مقامی اطلاعات میں بتایا گیا ہے کہ ہلاکتوں کی تعداد مقامی حکام کی جانب سے فراہم کردہ اعداد سے کہیں زیادہ ہے۔

داعش کی ایک ویب سائٹ پر شدت پسندوں نے کابل حملے کی ذمہ داری قبول کی ہے۔ داعش کی افغان شاخ نے کابل اور افغانستان کے دیگر مقامات پر شیعہ عبادت گاہوں پر کیے گئے حالیہ حملوں کی ذمہ داری بھی قبول کی ہے۔

دوسرے واقعہ میں ایک دیگر خود کش حملہ آور نے صوبہ غور کی ایک مسجد میں گھس کر خود کو اڑا لیا جس میں 30 سے زائد افراد کی موت ہوگئی اور متعدد افراد زخمی بھی ہو گئے ہیں۔