امریکہ صدارتی انتخاب: بائڈن کی راہ ہموار، سیکریٹ سروس نے بڑھائی سیکورٹی، گھر کے اوپر 'نو فلائی زون' قرار

امریکی صدر کونا ہوگا، اس سلسلے میں تذبذب کی صورت حال برقرار ہے، لیکن جو اشارے مل رہے ہیں اس سے تقریباً طے ہو گیا ہے کہ بائڈن ہی امریکہ پر آئندہ چار سال تک حکومت کرنے والے ہیں۔ اس کی وجہ یہ ہے کہ سیکریٹ سروس اور ایف بی آئی نے ان کی سیکورٹی بڑھا دی ہے اور ان کے گھر کے اوپر 'نو فلائی زو' قرار دے دیا گیا ہے۔ فاکس نیوز کی رپورٹ کے مطابق 214 کے مقابلے 264 ووٹ سے آگے چل رہے بائڈن کی سیکورٹی مزید سخت کر دی گئی ہے اور سیکرٹ سروس نے محاذ سنبھال لیا ہے۔

قابل ذکر ہے کہ ابھی جارجیا، پنسلوینیا اور نیواڈا میں بائڈن اور ٹرمپ کے درمیان سخت مقابلہ دیکھنے کو مل رہا ہے، لیکن جارجیا اور پنسلوینیا میں جس طرح سے بائڈن نے سبقت بنائی ہے، ان کے لیے صدر کی راہ ہموار ہوتی ہوئی نظر آ رہی ہے۔ ووٹوں کی گنتی کے درمیان جس طرح سے بائڈن کی سیکورٹی کو پختہ کیا گیا ہے، اس سے یہی اشارے مل رہے ہیں کہ ان کے صدر بننے کے امکانات انتہائی روشن ہو گئے ہیں۔

واشنگٹن پوسٹ نے ذرائع کے حوالے سے بتایا ہے کہ سیکریٹ سروس ایجنٹس کو ڈیلاور ولمنگٹن میں ریور فرنٹ کنونشن سنٹر میں بھیجا گیا ہے جہاں بائڈن کی ٹیم نے چیز سنٹر نام سے اپنا ہیڈکوارٹر بنایا ہوا ہے۔ انتخابی تشہیر ختم ہونے کے بعد سے ہی بائڈن یہاں مقیم ہیں اور امکان ہے کہ نتائج کا اعلان ہونے کے بعد وہ یہیں سے اپنی فاتحانہ تقریر کریں گے۔ حالانکہ اس سال کے مارچ سے ہی جو بائڈن کو سیکریٹ سروس کی سیکورٹی ملی ہوئی ہے، لیکن ان کی سیکورٹی میں اضافہ کیے جانے سے جو اشارہ مل رہا ہے اس سے ان کی جیت کے آثار مضبوط ہونے کا امکان ظاہر ہوتا ہے۔

غور طلب ہے کہ جو بائڈن نائب صدر رہ چکے ہیں اور ضابطہ کے مطابق انھیں 2017 میں نائب صدر عہدہ سے ہٹنے کے بعد 6 مہینے تک سیکرٹ سروس کی سیکورٹی ملتی رہی تھی۔ روایت ہے کہ جب کوئی امیدوار صدر انتخاب جیتتا ہے تو اسی رات اس کی سیکورٹی کو مضبوط کیا جاتا ہے، لیکن بائڈن کے معاملے میں سیکورٹی کو پہلے سے ہی مضبوط کر دیا گیا ہے۔