یوکرین پر حملہ کرنے والے روس کو ’یو ای ایف اے‘ نے دیا زوردار جھٹکا

روس کے ذریعہ یوکرین پر حملہ کیے جانے کے بعد حالات تیزی سے بدل رہے ہیں۔ دنیا کے کئی ممالک متحد ہو کر روس کے خلاف کھڑے ہو گئے ہیں۔ اس درمیان روس کو ایک بڑا جھٹکا بھی لگا ہے۔ یو ای ایف اے چمپئنز لیگ کا جو فائنل روس کے سینٹ پیٹرس برگ میں ہونے والا تھا، اب اسے وہاں سے ہٹا دیا گیا ہے۔ روس کے ذریعہ یوکرین پر حملہ کیے جانے کے بعد یہ سخت قدم اٹھایا گیا ہے۔ یو ای ایف اے نے ایک اہم میٹنگ طلب کی ہے جو جمعہ کو ہوگی۔ اسی میٹنگ میں آفیشیل طور پر چمپئنز لیگ کے فائنل کو سینٹ پیٹرس برگ کے باہر کرانے پر فیصلہ ہو جائے گا۔

یو ای ایف اے کی طرف سے جانکاری دی گئی ہے کہ روس اور یوکرین کے درمیان تازہ حالات کو دیکھتے ہوئے یو ای ایف اے سربراہ نے ایک ایمرجنسی میٹنگ بلائی ہے، جو جمعہ کو 10.00 (سی ای ٹی) بجے ہوگی۔ اسی میٹنگ میں مستقبل کے فیصلے لیے جائیں گے۔ لیے گئے فیصلوں کا اعلان میٹنگ کے بعد ہی کیا جائے گا۔

قابل ذکر ہے کہ روسی صدر ولادیمیر پوتن کے ذریعہ جنگ کے اعلان کے بعد ہی فٹبال کی دنیا میں فکر کے بادل دکھائی دینے لگے تھے۔ کئی ممالک، فٹبال آرگنائزیشن نے پہلے ہی اعتراض ظاہر کیا تھا اور چمپئنز لیگ کے فائنل کو روس سے باہر منتقل کرنے کا مطالبہ کیا تھا۔ یہ فائنل مئی 2022 میں روس کے سینٹ پیٹرس برگ میدان میں ہونا تھا۔ صرف چمپئنز لیگ کا فائنل ہی نہیں، بلکہ مارچ میں روس اور پولینڈ کا فٹبال مقابلہ ہے، جب کہ اسکاٹ لینڈ کا یوکرین سے فٹبال کا مقابلہ ہے۔ ان کو بھی رد کرنے کا فیصلہ جمعہ کی میٹنگ میں لیا جا سکتا ہے۔