سری لنکا میں پٹرول پمپ اپریل کے آخر تک خشک ہو سکتے ہیں

سری لنکا میں غیر ملکی ذخائر کی غیر معمولی کمی کے درمیان تیزی سے ختم ہونے والے ایندھن کی خریداری کے لیے ہندوستان کی طرف سے 500 ملین ڈالر کی لائن آف کریڈٹ کی مدد کے باوجود وہاں اس ماہ کے آخر تک ڈیزل ختم ہو سکتا ہے۔ حکام کے مطابق حالات کی نزاکت کو دیکھتے ہوئے سری لنکا کو ایندھن کی ترسیل مارچ کے آخر میں آنا شروع ہوئی جبکہ یہ یکم اپریل سے شروع ہونا تھی۔

واضح رہے کہ سری لنکا میں عوامی نقل و حمل اور تھرمل پاور جنریشن کے لیے ڈیزل کا بڑے پیمانے پر استعمال کیا جاتا ہے۔ ڈیزل کی کمی کی وجہ سے چند تھرمل پاور پلانٹس بند ہو گئے ہیں جس کی وجہ سے روزانہ 10 گھنٹے سے زیادہ بجلی کی کٹوتی کی جا رہی ہے۔ ملک کی واحد ریفائنری کو نومبر 2021 میں دو مرتبہ بند کرنا پڑا کیونکہ وہ درآمدات کی ادائیگی کے قابل نہیں تھی۔

ان حالات کو دیکھتے ہوئے مشتعل لوگ حکومت کے خلاف احتجاج کے لیے سڑکوں پر آگئے اور صدر کے استعفے کا مطالبہ کر رہے ہیں۔ دریں اثنا سری لنکا میڈیکل ایسوسی ایشن (SLMA) نے صدر راج پکشے کو ملک میں انتہائی ضروری ادویات کی قلت کے بارے میں خبردار کیا ہے۔ اس کے علاوہ گارمنٹ ایکسپورٹ انڈسٹری ایسوسی ایشن، سری لنکا جوائنٹ اپیرل ایسوسی ایشن فورم نے بھی صدر راج پکشے کو خط لکھ کر موجودہ بحران کے قلیل مدتی حل پر زور دیا ہے۔ انہوں نے کہا ہے کہ بجلی اور ایندھن کی قلت کی وجہ سے بڑے پیمانے پر گھریلو اور چھوٹے کاروبار بند ہو گئے ہیں۔