شمالی کوریا نے تین بیلسٹک میزائلوں کا کیا تجربہ

سیول: شمالی کوریا نے ہفتہ کو جاپان کے سمندر کی طرف کم فاصلے تک مار کرنے والی تین بیلسٹک میزائلوں کا تجربہ کیا۔ جنوبی کوریا کی یونہاپ نیوز ایجنسی نے فوج کے حوالے سے یہ اطلاع دی۔ یونہاپ نے جنوبی کوریا کے جوائنٹ چیف آف اسٹاف (جے سی ایس) کا حوالہ دیتے ہوئے کہا کہ شمالی کوریا نے ہفتہ کو مقامی وقت کے مطابق صبح 8 بجے کے قریب صوبہ ہوانگے کی چنگوا کاؤنٹی سے میزائل کا تجربہ کیا۔

جے سی ایس نے ہفتہ کو ایک بیان میں کہا، "ہماری فوج نگرانی اور چوکسی کو مضبوط بناتے ہوئے امریکہ کے ساتھ قریبی تعاون کے لئے پوری طرح تیار ہے۔" جاپان کی کیودو نیوز ایجنسی نے وزارت دفاع کے حوالے سے بتایا کہ تینوں بیلسٹک میزائلوں نے 350 کلومیٹر (217 میل) کی دوری سے پرواز کی، جو زیادہ سے زیادہ 100 کلومیٹر (62 میل) کی بلندی تک پہنچ گئیں۔ تمام میزائل جاپان کے خصوصی اقتصادی زون سے باہر گریں۔

اس سے قبل ہفتے کے روز یونہاپ نیوز ایجنسی نے اطلاع دی تھی کہ پیانگ یانگ نے بحیرہ جاپان کی طرف ایک بیلسٹک میزائل کا تجربہ کیا، جب کہ جاپانی میڈیا نے دو مشتبہ لانچوں کی اطلاع دی۔ جاپانی میڈیا رپورٹس کے مطابق، وزیر اعظم فومیوکیشیدا نے متعلقہ وزارتوں کو شمالی کوریا کے ہفتہ کے تجربے کا تفصیلی تجزیہ کرنے کی ہدایت دی ہے، اور جاپانی وزیر اعظم کے دفتر کے تحت ایک کرائسس ریسپانس سینٹر قائم کیا گیا ہے۔ نقصان کی کوئی اطلاع موصول نہیں ہوئی۔

میڈیا رپورٹس کے مطابق جاپان نے شمالی کوریا کے ہفتے کے روز کیے جانے والے تجربے کی مخالفت کا اظہار کیا ہے۔ شمالی کوریا نے اس سال تقریباً 40 تجربات کیے ہیں، جن میں تقریباً 70 میزائل داغے گئے ہیں، جن میں نومبر میں بین البراعظمی بیلسٹک میزائل کا تجربہ بھی شامل ہے۔