’ان کی مدد کے بغیر بھی جیتیں گے‘:فرانسیسی صدر میکرون کے بیان پر نیتن یاہو کا جواب

اسرائیلی وزیر اعظم بنجامن نیتن یاہو نے کہا کہ "تمام مہذب ممالک" کو اسرائیل کے ساتھ مضبوطی سے کھڑا ہونا چاہیے کیونکہ وہ ایران کی قیادت میں "وحشیانہ قوتوں" کا مقابلہ کرتا ہے اور انہوں نے فرانس کے صدر ایمانوئل میکرون کے اسرائیل پر ہتھیاروں پر پابندی کے مطالبے کو "شرمناک" قرار دیا۔

ہفتہ کو ایک ویڈیو پیغام جاری کرتے ہوئے وزیر اعظم نیتن یاہو نے اسے شرمناک قرار دیا اور کہا کہ "دہشت گردی کا محور ایک ساتھ کھڑا ہے، لیکن جو ممالک مبینہ طور پر اس دہشت گردی کے محور کی مخالفت کر رہے ہیں وہ اسرائیل پر ہتھیاروں کی پابندی کا مطالبہ کر رہے ہیں"۔ درحقیقت فرانس انٹر ریڈیو سے بات کرتے ہوئے میکرون نے کہا تھا کہ 'ہماری ترجیح کشیدگی کو بڑھنے سے روکنا ہے۔ میرے خیال میں آج کی ترجیح سیاسی حل تلاش کرنا اور غزہ میں جنگ کے لیے استعمال ہونے والے ہتھیاروں کو روکنا ہے۔

نیتن یاہو کے بیان کے فوراً بعد میکرون کے دفتر نے ایک بیان جاری کیا اور واضح کیا کہ فرانس اسرائیل کا کٹر دوست ہے اور اسرائیل کی سلامتی کی حمایت کرتا ہے۔ یہ بھی کہا کہ اگر ایران یا اس کے حامی اسرائیل پر حملہ کرتے ہیں تو فرانس ہمیشہ اسرائیل کے ساتھ کھڑا رہے گا۔

نیتن یاہو نے کہا کہ "اس وقت جب اسرائیل ایران کی قیادت میں وحشیانہ قوتوں سے لڑ رہا ہے، تمام مہذب ممالک کو اسرائیل کے ساتھ مضبوطی سے کھڑا ہونا چاہیے، اس کے باوجود صدر میکرون اور کچھ دوسرے مغربی رہنما اسرائیل کو ہتھیاروں کی فراہمی پر پابندی عائد کرنے کا مطالبہ کر رہے ہیں۔"

 نیتن یاہو نے اپنے پیغام میں کہا کہ اسرائیل "تہذیب کے دشمنوں کے خلاف سات محاذوں پر اپنا دفاع کر رہا ہے۔ ہم غزہ میں حماس کے خلاف لڑ رہے ہیں، ان کے خلاف لڑ رہے ہیں جنہوں نے 7 اکتوبر کو ہمارے لوگوں کو قتل کیا، عصمت دری کی ، لوگوں کے سر قلم کیے اور انہیں جلایا۔"

نیتن یاہو نے مزید کہا، 'ہم لبنان میں حزب اللہ کے خلاف لڑ رہے ہیں، جو دنیا کی سب سے زیادہ ہتھیاروں سے لیس دہشت گرد تنظیم ہے، جو ہماری شمالی سرحد پر 7 اکتوبر سے بھی بڑے قتل عام کی منصوبہ بندی کر رہی تھی۔ اس نے تقریباً ایک سال سے اسرائیلی شہروں اور قصبوں پر راکٹ فائر کیے ہیں۔ ہم یمن میں حوثیوں اور عراق اور شام میں شیعہ ملیشیا سے لڑ رہے ہیں جنہوں نے مل کر اسرائیل کے خلاف سینکڑوں ڈرون اور میزائل حملے کیے ہیں۔ ہم یہودیہ اور سامریہ میں دہشت گردوں کے خلاف لڑ رہے ہیں، جو ہمارے شہروں کے قلب میں شہریوں کو قتل کرنے کی کوشش کر رہے ہیں۔ اور ہم ایران کے خلاف لڑ رہے ہیں، جس نے پچھلے ہفتے اسرائیل پر 200 سے زیادہ بیلسٹک میزائل فائر کیے ۔‘ نیتن یاہو نے کہا کہ اسرائیل ان مغربی ممالک کی مدد سے یا اس کے بغیر جیت جائے گا۔ انہوں نے کہا کہ اسرائیل جنگ جیتنے تک نہیں رکے گا۔