ابراہیم رئیسی خامنہ ای کے جانشین بن سکتے ہیں: واشنگٹن پوسٹ

امریکی اخبار واشنگٹن پوسٹ نے دعوی کیا ہے کہ ایران کے نو منتخب صدر ابراہیم رئیسی ایران کے رہبر اعلی آیت اللہ خامنہ ای کے ممکنہ جانشیں ہوں گے۔ واشنگٹن پوسٹ نے اطلاع دی ہے کہ ایران کے نئے صدر ابراہیم رئیسی ایران کے رہ بر اعلیٰ آیت اللہ خامنہ ای کی جانشینی کے لیے ممکنہ امیدوار ہیں۔اخبار نے ''رئیسی کی جارحیت پسندی، ایران کے جوہری اور علاقائی عزائم کے بارے میں واشنگٹن میں تشویش کی طرف اشارہ کیا۔اخبارنے لکھا کہ رئیسی غیر ملکی سرمایہ کاروں کے لیے ایران کی معیشت کھولنے کے سخت مخالف ہیں۔

واضح رہے امریکہ اور مغربی طاقتیں ایران کے نو منتخب صدر ابراہیم رئیسی کو لے کر کافی پریشان ہیں اور ان کی کوشش ہے کہ ایران میں ابراہیم رئیسی کے تعلق سے نئےتنازعات کو جنم دیا جائے ۔ ابرہیم رئیسی کےتعلق سے یہ خبر بھی اس کا حصہ ہو سکتی ہے ۔ دراصل حقیقت یہ ہے کہ ابراہیم رئیسی کے اقتدار میں ایران کی خارجہ پالیسی میں کوئی تبدیلی نہیں آئے گی اورجوہری معاملہ پر ایران اپنے موقف پر قائم رہے گا۔

اخبار نے کہا ہے کہ شواہد سے تصدیق ہوتی ہے کہ ایرانی انتخابات میں ٹرن آؤٹ کا جو تناسب حکومت نے بتایا وہ حقیقی ٹرن آؤٹ سے بہت زیادہ ہے۔ گزشتہ ہفتے ایرانی وزیرداخلہ عبد الرضا رحمانی فضلی نے اعلان کیا تھا کہ صدارتی انتخابات میں 17.8 ملین ووٹروں نے ابراہیم رئیسی کو صدر چنا ہے جوکہ کل ڈالے گئے ووٹوں کی کا 61 اعشاریہ 95 فی صد ہے۔