ہنگری: آندھی اور بارش کی پیش گوئی غلط ثابت ہونے پر محکمہ موسمیات کے سربراہ کو ہٹایا گیا!

یورپی ملک ہنگری میں سینٹ اسٹیفن ڈے جوش و خروش کے ساتھ منایا جاتا ہے اور اس دن کے لیے نہ صرف بھرپور تیاریاں کی جاتی ہیں بلکہ شہری بھی اس دن کا پورے سال شدت سے انتظار کرتے ہیں۔ ایسا اس لیے کیونکہ اس دن یہاں یورپ کی سب سے بڑی آتش بازی ہوتی ہے۔

عالمی خبر رساں ادارے کے مطابق ہنگری کے دارالحکومت بوڈاپیسٹ میں اس سال بھی سینٹ اسٹیفن ڈے بھرپور طریقے سے منانے کی تیاریاں کی گئی تھیں۔ حسب روایت نہ صرف سرکاری تعطیل تھی بلکہ یہاں یورپ کی شاندار آتش بازی کا مظاہرہ بھی ہونا تھا۔ اس کے لیے 40 ہزار فائر ورکس جلانے کا انتظام کیا گیا تھا اور تقریباً 20 لاکھ افراد اس تقریب میں شریک ہونے والے تھے۔ لیکن تقریب کے آغاز سے صرف 7 گھنٹے قبل محکمہ موسمیات نے گرج چمک کے ساتھ بارش اور آندھی کی پیش گوئی کی جس پر حکومت اور انتظامیہ نے افسردہ دل کے ساتھ آتش بازی کو منسوخ کر دیا۔

یہاں غور کرنے والی بات یہ ہے کہ محکمہ موسمیات کی پیش گوئی غلط ثابت ہو گئی۔ نہ ہی بارش ہوئی اور نہ آندھی چلی۔ اس غلط پیش گوئی کے بعد عوام میں شدید غم وغصے کی لہر دوڑ گئی۔ اپوزیشن نے بھی شدید تنقید کی جس کے بعد حکومت نے بھی محکمہ موسمیات سے سخت باز پرس کی ہے۔ میڈیا رپورٹس کے مطابق نیشنل میٹرولوجیکل سروس کی صدر کورنیلیا ریڈکس اور ان کے ڈپٹی چیف گیولا ہورواتھ کو عہدوں سے برطرف کر دیا گیا ہے۔ برطرفی کی وجہ تو نہیں بتائی گئی تاہم معلوم ہوتا ہے کہ ان کی برطرفی کی وجہ موسم کی غلط پیش گوئی ہی بنی ہے۔