اسرائیلی شہر حائفہ پر حزب اللہ نے داغے 135 سے زائد راکیٹ، یمن نے بھی بیلسٹک میزائل سے کیا حملہ

اسرائیل اور لبنان کے درمیان جنگ میں مزید شدت آ گئی ہے۔ حماس حملہ کے ایک سال مکمل ہونے پر اسرائیل کے کئی شہروں میں راکیٹ سے حملے کیے گئے ہیں۔ ان حملوں میں کئی اسرائیلی شہریوں کے زخمی ہونے کی اطلاع بھی موصول ہو رہی ہے۔ میڈیا رپورٹس کے مطابق اسرائیل کے تیسرے سب سے بڑے شہر حائفہ پر تازہ حملہ ہوا ہے جس نے حالات کو مزید کشیدہ بنا دیا ہے۔ حزب اللہ نے دعویٰ کیا ہے کہ اس نے اسرائیلی شہر حائفہ کے شمالی علاقہ میں بڑے پیمانے پر راکیٹ داغے ہیں۔

الجزیزہ کی ایک رپورٹ کے مطابق حزب اللہ نے دعویٰ کیا ہے کہ کئی راکیٹ ہوائی ڈیفنس سسٹم کو چکما دے کر زمین پر گرے ہیں اور تباہی پھیلائی ہے۔ اس سے کم از کم 10 افراد کے زخمی ہونے کی اطلاع موصول ہو رہی ہے۔ ایک دیگر میڈیا رپورٹ میں بتایا گیا ہے کہ داغے گئے راکیٹ کی تعداد 135 سے زیادہ ہے۔

اس درمیان یمن سے بھی اسرائیل پر بیلسٹک میزائل داغے گئے ہیں۔ ’دی ٹائمز آف اسرائیل‘ کے مطابق جب حملہ ہوا تو وسطی اسرائیل میں سائرن کی آوازیں گونجنے لگیں۔ آئی ڈی ایف (اسرائیل ڈیفنس فورس) نے بھی اس بات کی تصدیق کی ہے کہ وسط اسرائیل میں بجنے والے سائرن یمن سے ہوئے میزائل حملہ کے سبب بجائے گئے تھے۔ حالانکہ آئی ڈی ایف نے یہ بھی کہا ہے کہ میزائل کو اسرائیلی فضائی ڈیفنس سسٹم نے کامیابی کے ساتھ روک دیا۔

قابل ذکر بات یہ ہے کہ حملے صرف اسرائیل پر ہی نہیں ہو رہے ہیں، بلکہ اسرائیل کے ذریعہ بھی بربریت جاری ہے۔ آئی ڈی ایف نے 7 اکتوبر کو ایک بیان میں بتایا کہ بیروت میں اس کی طرف سے ایئر اسٹرائک کی گئی ہے۔ اسرائیلی ملٹری کی طرف سے یہ بھی جانکاری دی گئی کہ یہ اسٹرائک نشانہ بنا کر کی گئی تھی اور اس کے بارے میں وہ جلد ہی تفصیلات مہیا کرائے گی۔ اس بیان کے بعد ترکیے اور ایران کی طرف سے شدید رد عمل کا اظہار کیا گیا ہے۔ ترکیے کے صدر نے دھمکی آمیز انداز میں کہا ہے کہ بنجامن نیتن یاہو کا ملک جو کچھ کر رہا ہے، وہ قتل عام ہے۔ اسے اس کی قیمت ادا کرنی پڑے گی۔ ایرانی پارلیمنٹ کے اسپیکر گالیبوف نے بھی اسرائیلی بربریت کی شدید مذمت کی ہے، اور ساتھ ہی امریکہ کو بھی کٹہرے میں کھڑا کیا ہے۔ انھوں نے اسرائیل کی طرف سے کیے جا رہے جرائم کے لیے بلاواسطہ طور پر امریکہ کو قصوروار ٹھہرایا ہے۔