آئندہ سالوں میں کورونا سے زیادہ تباہ کن ہوگی ’خشک سالی‘: اقوام متحدہ

نیویارک: عالمی موسمیاتی تغیرات، کورونا کے دوران معاشی بحران اور اس کے نتیجے میں مختلف مسائل کے درمیان اقوام متحدہ نے خبردار کیا ہے کہ آئندہ سالوں میں خشک سالی کورونا وائرس کے مقابلے میں بڑے پیمانے پر تباہی پھیلائے گی۔ پانی کی قلت کے باعث خشک سالی سے متعلق اقوام متحدہ کے نمائندہ خصوصی مامی میزوتوری نے ایک رپورٹ میں بتایا کہ ’’آئندہ برسوں میں پانی کی قلت اور خشک سالی وبا کے طور پر دہانے پر کھڑی ہے جو کورونا سے زیادہ تباہی مچائے گی اور اس وبا کی کوئی ویکسین بھی نہیں بن سکتی۔‘‘

میڈیا رپورٹ کے مطابق نمائندہ خصوصی مامی میزوتوری نے کہا ہے کہ 1998 سے 2017 خشک سالی کے باعث 124 ارب ڈالر کا معاشی نقصان کا سامنا کرنا پڑا جب کہ ڈیڑھ ارب سے زائد انسان اس پانی کی قلت کے باعث متاثر ہوئے۔ مامی نے اقوام متحدہ کی جاری کردہ رپورٹ میں یہ بھی بتایا کہ جنوبی یوروپ اور مغربی افریقہ میں گلوبل وارمنگ کے باعث خشک سالی کا عمل تیز ہوگیا ہے۔ اگر کوئی فوری قدم نہ اٹھایا گیا تو نقصان کا ازالہ مشکل ہوجائے گا۔

رپورٹ میں یہ بھی بتایا گیا ہے کہ رواں برس 130 ممالک کو خشک سالی کا سامنا کرنا پڑسکتا ہے، جب کہ 38 ممالک کو پانی کی قلت اور خشک سالی دونوں کا سامنا کرنا پڑسکتا ہے۔ اقوام متحدہ نے خدشہ ظاہر کیا ہے کہ ’’براعظم افریقہ کے وسیع علاقے، وسطی اور جنوبی امریکہ، وسطی ایشیا، جنوبی یورپ، میکسیکو اور امریکہ میں زیادہ اور تیزی سے خشک سالی آسکتی ہے اور یورپ کے 40 فیصد درآمدات بھی متاثر ہونے کا امکان ہے۔‘‘