نیوزی لینڈ میں بھی اب روزانہ بڑھ رہے کورونا کیسز، گزشتہ 24 گھنٹوں میں 13 نئے مریض آئے سامنے

کورونا انفیکشن پر پوری طرح قابو پانے کے بعد ایک بار پھر نیوزی لینڈ میں اس وائرس کا پھیلاؤ شروع ہو گیا ہے جس کی وجہ سے حکومت تشویش میں مبتلا ہے۔ گزشتہ کچھ دنوں سے ایک بار پھر نیوزی لینڈ میں روزانہ کورونا انفیکشن کے نئے معاملے سامنے آ رہے ہیں۔ منگل کے روز محکمہ صحت کے ذریعہ جاری اعداد و شمار میں بتایا گیا ہے کہ گزشتہ 24 گھنٹوں کے دوران کورونا انفیکشن کے 13 نئے کیسز رپورٹ ہوئے ہیں۔

وزارت صحت نے بتایا کہ نئے معاملوں کی تصدیق کے بعد نیوزی لینڈ میں متاثرہ افراد کی تعداد بڑھ کر 1293 ہوگئی ہے۔ چونکہ ملک میں حالات کافی بہتر ہو گئے تھے اور نئے معاملے بھی سامنے نہیں آ رہے تھے اس لیے عوام مطمئن تھی اور یہ بھی امکان ظاہر کیا جا رہا تھا کہ اب سبھی طرح کی سرگرمیاں جاری رہیں گی اور لاک ڈاؤن کا بھی سامنا نہیں کرنا پڑے گا۔ لیکن کورونا وبا کی دوسری لہر کو دیکھتے ہوئے کچھ مقامات پر لاک ڈاؤن کا نفاذ بھی کرنا پڑا۔

اس درمیان وزیر اعظم جیسنڈا آرڈرن نے حالات کو پیش نظر رکھتے ہوئے عام انتخابات کو بھی چار ہفتوں، یعنی 17 اکتوبر تک کے لیے ملتوی کر دیا ہے۔ یہ اعلان آرڈرن نے پیر کے روز ہی کر دیا۔ انھوں نے کہا کہ "ہمیں کچھ عرصہ کووڈ-19 کے ساتھ رہنا پڑے گا۔ یہ نہیں سمجھنا چاہیے کہ الیکشن ملتوی کرنے سے خطرہ کم ہو جائے گا۔"انہوں نے مزید کہا کہ وہ انتخابات کی تاریخ میں دوبارہ تبدیلی نہیں کریں گی۔