بنگلہ دیش میں بد سے بدتر ہو رہے حالات، شیرپور واقع جیل پر بھیڑ کا حملہ 500 سے زائد قیدی نکل بھاگے

بنگلہ دیش میں طلبا کے تشدد نے حالات کو بد سے بدتر کر دیا ہے۔ طلبا کی ناراضگی کو دیکھتے ہوئے شیخ حسینہ وزیر اعظم عہدہ سے استعفیٰ دے کر 5 اگست کو ہی ہندوستان پہنچ گئیں اور خبریں سامنے آ رہی ہیں کہ وہ لندن روانہ ہونے کی تیاری کر رہی ہیں۔ اس درمیان تازہ ترین خبروں میں بتایا جا رہا ہے کہ بنگلہ دیش میں حالات ہر گزرتے وقت کے ساتھ خراب ہوتے جا رہے ہیں۔ شمالی بنگلہ دیش کے شیرپور ضلع میں موجود ایک جیل پر بھیڑ کے ذریعہ حملہ کیے جانے کی خبریں سامنے آ رہی ہیں۔

میڈیا رپورٹس کے مطابق شیرپور ضلع میں لاٹھیوں سے لیس ایک بھیڑ نے ضلع جیل میں گھس کر 500 سے زائد قیدیوں کو چھڑا لیا۔ دوسری طرف شورش پسندوں نے کم از کم 6 پولیس اسٹیشنوں میں توڑ پھوڑ کر آگ لگا دی ہے۔ ان پولیس اسٹیشنوں سے اسلحے، گولیاں اور دیگر سامان لوٹے جانے کی خبریں بھی سامنے آ رہی ہیں۔ ’ڈھاکہ ٹریبیون‘ کی ایک رپورٹ میں بتایا جا رہا ہے کہ عوامی لیگ کے لیڈران و کارکنان کے گھروں و افسران کو بھی نشانہ بنایا گیا ہے۔

اس درمیان بنگلہ دیش میں عبوری حکومت تشکیل دینے کی کوششیں بھی شروع ہو گئی ہیں۔ قوم کے نام ایک ٹیلی ویژن خطاب میں فوجی چیف وقار الزماں نے 5 اگست کو ہی اعلان کر دیا تھا کہ فوج عبوری حکومت تشکیل دے گی۔ اب طلبا تحریک کے کوآرڈنیٹرس محمد ناہد اسلام، آصف محمود اور ابوبکر مجومدار نے 6 اگست کو جانکاری دی ہے کہ محمد یونس بنگلہ دیش میں عبوری حکومت کے چیف ایڈوائزر یعنی صلاح کار ہوں گے۔ قابل ذکر ہے کہ محمد یونس بنگلہ دیش کی نوبل انعام یافتہ شخصیت ہیں۔