نیپال میں پھر سیاسی بحران کے امکانات، آر ایس پی نے پی ایم پراچندا کی حکومت چھوڑنے کا کیا اعلان

نیپال: حکمراں اتحاد کے اندر دراڑ بڑھتے ہی، چوتھی سب سے بڑی پارٹی، راشٹریہ سواتنتر پارٹی نے پشپا کمل دہل ' پراچندا' کی قیادت میں نئی ​​بننے والی حکومت سے علیحدگی کا فیصلہ کیا ہے، جس کے بعد جلد ہی پارٹی کے تمام وزراء اجتماعی طور پر استعفیٰ دے دیں گے۔ آر ایس پی کے صدر ربی لامیچھانے نے اس فیصلے کے بعد کہا کہ پارٹی رہنماؤں نے حکومت چھوڑنے کے لیے اتوار کو میٹنگ کی اور کابینہ سے واک آؤٹ کرنے کا فیصلہ کیا۔

ربی لامیچھانے نے کہا کہ تمام وزراء اپنے استعفے آج ہی وزیراعظم کو پیش کر دیں گے۔  پراچندا حکومت میں، آر ایس پی وزارت محنت، روزگار اور سماجی تحفظ، تعلیم، سائنس اور ٹیکنالوجی کی وزارت جیسے محکموں کی سربراہی کر رہی تھی۔ اس کے علاوہ صحت اور آبادی کی وزارت کے وزیر مملکت کی ذمہ داری بھی تھی۔

حکمران اتحاد میں دراڑ گزشتہ ماہ اس وقت شروع ہوئی جب لامیچھانے کی ایک عدالت کی جانب سے ان کی شہریت کو کالعدم قرار دینے کے بعد سپریم کورٹ نے بھی ان کی ممبر پارلیمنٹ کی رکنیت کو غیر قانونی قرار دے دیا۔ عدالت نے جس وقت فیصلہ سنایا اس وقت لامیچھانے نائب وزیر اعظم اور وزیر داخلہ بھی تھے۔ عہدے سے ہٹائے جانے کے بعد، لامیچھانے نے اپنی بحالی کا مطالبہ کرنے کے لیے پی ایم  پراچندا کے ساتھ کئی دور کی میٹنگیں کیں اور مطالبات پورے نہ ہونے پر حکومت چھوڑنے کی دھمکی دی۔

ربی لامیچھانے کی زیرقیادت آر ایس پی نے نومبر 2022 کے عام انتخابات میں ایک متبادل قوت اور لوگوں کی امید کے طور پر ابھر کر ایک طوفان کھڑا کر دیا تھا۔ لیکن حال ہی میں، یہ طاقت کے کھیل اور سیاست میں الجھ گئے، کیونکہ حکام پاسپورٹ جعلسازی کے معاملے میں سابق وزیر داخلہ لامیچھانے سے تفتیش کر رہی ہے۔ لامیچھانے کو ایک ہی وقت میں ایک امریکی اور نیپالی پاسپورٹ کا استعمال کرتے ہوئے پایا گیا، معاملہ زیر تفتیش ہے۔

27 جنوری کو نیپال کی سپریم کورٹ نے آر ایس پی کے صدر ربی لامیچھانے کو ان کے ممبر پالیمنٹ کے عہدے سے ہٹاتے ہوئے کہا کہ انہوں نے پارلیمانی انتخابات لڑنے کے لیے جو شہریت کا سرٹیفکیٹ پیش کیا تھا وہ غلط تھا۔ شہریت کے سرٹیفکیٹ کی منسوخی سے انہیں وزیر داخلہ اور پارٹی صدر کا عہدہ بھی چھوڑنا پڑا۔ سپریم کورٹ نے فیصلے میں واضح طور پر کہا ہے کہ لامیچھانے امریکی شہری بننے کے بعد نیپالی شہریت کھو چکے ہیں۔ تاہم، انہوں نے نیپالی پاسپورٹ حاصل کرنے اور ایوان زیریں کا انتخاب لڑنے کے لیے اپنی قانونی طور پر ختم شدہ شہریت کا استعمال کیا۔