افغانستان: کابل میں وزارت خارجہ کے پاس زوردار دھماکہ، 13 افراد جاں بحق، زخمیوں میں آئی ای اے جوان بھی شامل

افغانستان میں بم دھماکوں کا سلسلہ رکنے کا نام نہیں لے رہا ہے۔ تازہ دھماکہ افغانستان کی راجدھانی کابل میں وزارت خارجہ کے قریب ہوا ہے۔ افغانستان کی میڈیا رپورٹس میں بتایا جا رہا ہے کہ دھماکہ بہت زوردار تھا اور اس کی آواز کافی دور تک سنی گئی۔ اس دھماکہ میں 13 افراد کی موت کی خبریں بھی سامنے آ رہی ہیں جبکہ کچھ دیگر افراد زخمی ہوئے ہیں۔

افغانی میڈیا نے طالبان کے خصوصی ذرائع کا حوالہ دیتے ہوئے بتایا کہ دھماکہ پیر کی دوپہر وزارت خارجہ کے مین چیک پوسٹ کے پاس ہوا۔ افغانستان کی ٹولو نیوز کے مطابق اس واقعہ کے چشم دید لوگوں کا کہنا ہے کہ دھماکہ وزارت خارجہ کی سڑک پر قابل کے ڈاؤن ٹاؤن میں داؤدزئی ٹریڈ سنٹر کے پاس ہوا ہے۔ حالانکہ طالبان حکومت نے ابھی تک اس دھماکہ سے متعلق کوئی آفیشیل بیان جاری نہیں کیا ہے۔

افغانی میڈیا نے ذرائع کے حوالے سے اس دھماکہ کو خود کش حملہ بتایا ہے۔ کچھ چشم دید افراد کا کہنا ہے کہ ایک شخص کو چیک پوسٹ کی طرف بھاگتے ہوئے دیکھا گیا تھا جس کے بعد یہ دھماکہ ہوا۔ دوسری طرف کابل پولیس نے ابھی تک اس معاملے میں 6 لوگوں کی موت کی تصدیق کی ہے اور کچھ لوگوں کے زخمی ہونے کی بھی اطلاع دی گئی ہے۔ کابل پولیس کے ترجمان خالد زردا نے کہا کہ زخمیوں میں 3 آئی ای اے جوان شامل ہیں۔

واضح رہے کہ رواں سال جنوری میں بھی کابل میں وزارت خارجہ کے باہر زوردار دھماکہ ہوا تھا۔ اس وقت 20 لوگ جاں بحق ہوئے تھے۔ 11 جنوری کو ہونے والا وہ دھماکہ خود کش حملہ تھا جس نے طالبان حکومت کو ہلا کر رکھ دیا تھا۔ اس دوران دھماکے ساتھ ساتھ گولی باری کی آواز بھی سنائی دی تھی۔