مکہ مکرمہ میں مسجد الحرام کی اوپری منزل سے ایک شخص نے لگا دی چھلانگ، اسپتال میں داخل

مکہ مکرمہ میں مسجد الحرام کی اوپری منزل سے ایک شخص کے چھلانگ لگانے کا معاملہ سامنے آیا ہے۔ سعودی میڈیا میں آ رہی خبروں کے مطابق ایک شخص نے مسجد الحرام کی اوپری منزل سے چھلانگ لگا دی جس کے بعد وہاں موجود سیکورٹی اہلکار حرکت میں آ گئے۔ اس شخص کو فوری طور پر اسپتال لے جایا گیا جہاں علاج و معالجہ کا عمل شروع ہو گیا ہے۔

مکہ کی سیکورٹی اتھارٹی نے اس واقعہ کے تعلق سے منگل کی صبح جانکاری دی۔ مسجد الحرام کی اسپیشل سیکورٹی فورس نے مسجد کی اوپری منزلوں سے نیچے چھلانگ لگانے والے شخص سے متعلق تفتیش کا آغاز کر دیا ہے۔ سیکورٹی نے منگل کو جاری کردہ بیان میں بتایا کہ حرم کی بالائی منزل سے چھلانگ لگانے والے شخص کو ضابطے کی ضروری کارروائی اور علاج کے لیے اسپتال منتقل کر دیا گیا ہے۔ حالانکہ اس واقعے سے متعلق سرکاری طور پر مزید کوئی تفصیل نہیں بتائی گئی۔ نتیجہ کار یہ پتہ نہیں لگ سکا ہے کہ مسجد کی اوپری منزل سے کودنے والے شخص کا تعلق کس ملک سے ہے، یا پھر اس نے یہ عمل کیوں انجام دیا۔

قابل ذکر ہے کہ یہ پہلا معاملہ نہیں ہے جب کسی نے مسجد الحرام میں مبینہ طور پر خودکشی کی کوشش کی۔ 2017 میں ایک سعودی باشندہ نے کعبہ کے سامنے خود کو نذرِ آتش کرنے کی کوشش کی تھی۔ حالانکہ سیکورٹی فورسز نے اس کی جان بچا لی تھی۔ 2018 میں تو خودکشی کے تین واقعات پیش آئے تھے۔ جون 2018 میں ایک فرانسیسی شخص نے مسجد کی چھت سے کود کر جان دے دی تھی۔ جون 2018 میں ہی ایک بنگلہ دیشی شخص نے اسی طریقے سے خود کشی کر لی تھی۔ پھر اگست 2018 میں ایک سعودی باشندہ نے گرانڈ مسجد سے کود کر خودکشی کر لی تھی۔