اپنے ہی لوگوں کے خلاف کھڑی ہوئی بی جے پی ممبر پارلیمنٹ، کہا ’جناح عظیم ہستی تھے‘

علی گڑھ مسلم یونیورسٹی میں محمد علی جناح کی تصویر کا تنازعہ ابھی تک مدھم نہیں پڑا ہے اور اس درمیان کئی بی جے پی لیڈران بھی سامنے آئے ہیں جنھوں نے یونیورسٹی میں جناح کی تصویر کو صحیح ٹھہرایا ہے۔ بی جے پی ممبر پارلیمنٹ ساوتری بائی پھولے نے تو ایک بیان میں انھیں ہندوستان کی عظیم شخصیت قرار دیا ہے۔ ان کا کہنا ہے کہ ’’جناح ایک عظیم شخص تھے جن کا ملک کی آزادی میں انتہائی اہم کردار رہا ہے۔ ایسے شخص کی تصویر جہاں ضرورت ہو وہاں لگائی جانی چاہیے۔‘‘ ساتھ ہی انھوں نے اشاروں اشاروں میں بی جے پی پر غریبی اور بھکمری جیسے ایشوز سے عوام کی توجہ بھٹکانے کا الزام بھی عائد کیا۔ انھوں نے کہا کہ بلاوجہ کے ایشوز اٹھا کر اہم ایشوز کو دبانے کی کوشش کی جا رہی ہے۔

دراصل ساوتری بائی پھولے بی جے پی لیڈروں کے ذریعہ غلط بیانات اور دلتوں کے خلاف ان کی پالیسیوں سے پہلے بھی ناراضگی ظاہر کرتی رہی ہیں۔ انھوں نے اپنے تازہ بیان میں جناح کی تصویر کے علاوہ اتر پردیش کابینہ وزیر اوم پرکاش راجبھر کے بیان پر بھی اپنا رد عمل ظاہر کیا۔ انھوں نے میڈیا سے بات کرتے ہوئے کہا کہ راجبھر نے پسماندہ طبقات کو نظر انداز کرنے کا جو الزام یوگی حکومت پر لگایا ہے وہ صحیح ہے۔

قابل ذکر ہے کہ اس سے قبل یوگی کابینہ میں وزیر سوامی پرساد موریہ نے بھی محمد علی جناح کو عظیم ہستی قرار دیا تھا۔ انھوں نے کہا تھا کہ ملک کی تقسیم سے قبل جناح کا اس ملک کی تعمیر میں اہم کردار تھا۔ ایسے میں اگر کوئی ان پر انگلی اٹھاتا ہے تو یہ نہایت گھٹیا بات ہے۔ موریہ نے اپنے بیان میں یہ بھی کہا تھا کہ اس طرح کے بکواس بیانات ان کی پارٹی کے ممبران پارلیمنٹ و ممبران اسمبلی دیں یا پھر کسی اور پارٹی کے، جمہوریت میں اس طرح کے بیانات کی کوئی اہمیت نہیں ہے۔