دہلی کے مالویہ نگر میں 18 گھنٹے بعد بھی آگ بے قابو، ہیلی کاپٹر کی مدد لی گئی

دہلی کے جنوب میں واقع مالویہ نگر علاقہ کے گوڈاؤن میں لگی آگ پر 18 گھنٹے کے بعد بھی قابو نہیں پایاجا سکا ہے۔ آگ اتنی شدید ہے کہ دہلی ڈیزاسٹر منیجمنٹ اتھارٹی نے آگ بجھانے کے لئے ہیلی کاپٹر کی مدد مانگی ہے۔ فی الحال ہیلی کاپٹر کی مدد سے آگ پر قابوپانے کی کوشش کی جا رہی ہے۔ وہیں آگ کی دہشت کے سبب آس پاس کےرہنے والے لوگو ں نے پوری رات اپنے گھروں کے باہر کھلے میں گزاری ۔ خوف کا عالم یہ تھا کہ لوگوں نے گھروں میں رکھا اپناقیمتی سامان تک سمیٹ لیا تھا ۔

گوڈاؤن کے نزدیک رہائشی لوگوں کا کہنا ہے کہ ’منگل کی شام جب آگ لگی تو اسے بجھا لینے کا دعوی کیا گیا تھا ، لیکن شام کو جب تیز ہوا چلنی شروع ہوئی تو آگ بھی تیزی سے پھیلنے لگی۔ دیکھتے ہی دیکھتے خوفناک شعلے نظر آنے لگے۔‘ ایک شخص نے بتایا کہ اس کا گھر گوڈاؤن سے ملحق ہے اس لئے اس نے سارا قیمتی سامان سمیٹ کر کار میں رکھ دیا ہے۔ آگ کی وجہ سے کئی لوگ اپنے رشتہ داروں کے یہاں چلے گئے ہیں۔

واضح رہے کہ جہاں آگ لگی ہے اس کے ایک طرف نرنکاری پبلک اسکول ہے تو دوسری طرف رہائشی علاقہ۔ یہ آگ آس پاس کے مکانوں کو اپنی زد میں بھی لے سکتی ہے اس لئے ان مکانوں کو خالی کرا لیا گیا ہے۔ سب سے بڑا سوال یہ ہے کہ آخر رہائشی علاقہ میں ربر اور کیمیکل کا گوڈاؤن بنانے کی اجازت کس نے دی۔ یہ گوڈاؤن غیر قانونی طور پر تعمیر کیا گیا ہے۔ پولس اب اس بات کی بھی جانچ کرے گی۔ آگ زیادہ نہ پھیلے اس کے لئے انتظامیہ نے گوڈاؤن میں رکھے کیمیکل اور ربر کے ڈرموں کو باہر نکلوالیا۔

ادھر دہلی کے بڑاڑی علاقہ میں ایک کپڑے کے گودام میں شدید آگ لگنے کی اطلاع ہے۔ بدھ کی صبح تقریباً 4.15 بجے یہ آگ لگی۔ آگ پر قابو پانے کے لئے فائر بریگیڈ کی 25 گاڑیاں موقع پر موجود ہیں۔ فی الحال آگ بجھانے کا کام جاری ہے۔