اہم خبریں LIVE: ’کتنے بھی ایکٹ بناتے رہیں، مسلمان قرآن کے حکم پر چلے گا‘، سماجوادی پارٹی رکن پارلیمنٹ ایس ٹی حسن کا بیان

آسام حکومت کے ذریعہ مسلم شادی و طلاق رجسٹریشن ایکٹ کو منسوخ کیے جانے پر سماجوادی پارٹی رکن پارلیمنٹ ایس ٹی حسن نے سخت رد عمل ظاہر کیا ہے۔ انھوں نے کہا ہے کہ مسلمان قرآن کے حکم پر چلے گا، ایکٹ کتنے بھی بناتے رہیں۔ ایس ٹی حسن نے کہا کہ ’’کیا مسلمانوں سے یہ کہا جائے گا کہ نکاح مت کرو، کوئی دوسرا طریقہ استعمال کرو۔ کیا ہندوؤں سے کہا جائے گا کہ لاشوں کو نذرِ آتش مت کرو، دفن کر دو۔ ہر مذہب کے اپنے رسوم و رواج ہیں، وہ اسے ہزاروں سالوں سے مانتے چلے آ رہے ہیں اور مانتے رہیں گے۔‘‘

کانگریس کے سابق صدر راہل گاندھی کی قیادت میں ’بھارت جوڑو نیائے یاترا‘ ایک بار پھر شروع ہو گئی ہے۔ آج یہ یاترا مراد آباد سے شروع ہوئی جس میں لوگوں کی زبردست بھیڑ دکھائی دے رہی ہے۔ اس یاترا میں آج پرینکا گاندھی بھی شریک ہوئیں۔ راہل گاندھی اور پرینکا گاندھی ایک ساتھ کھلی ہوئی جیپ پر سوار ہو کر لوگوں کا استقبال کرتے ہوئے نظر آئے۔

مغربی بنگال کے آسنسول واقع ایک گودام میں خوفناک آتشزدگی کا معاملہ پیش آیا ہے۔ یہ گودام جامڑیا کے جادوڈانگا علاقہ میں واقع ہے۔ آگ کی خبر ملتے ہی فائر بریگیڈ کے دستے جائے حادثہ پر پہنچ گئے ہیں اور آگ پر قابو پانے کی کوششیں کر رہے ہیں۔

راجدھانی دہلی میں موسم کا مزاج ایک بار پھر بدلتا ہوا دکھائی دے رہا ہے۔ ہفتہ یعنی 24 فروری کو جزوی طور پر بادل چھائے رہنے کی پیشین گوئی ہے اور 25 سے 27 فروری کے درمیان بارش کا امکان ظاہر کیا گیا ہے۔ یعنی راجدھانی میں ایک بار پھر موسم سرد ہونے والا ہے۔