اہم خبریں: کانپور تشدد معاملے میں پولیس نے نظام قریشی کو کیا گرفتار

کانپور تشدد معاملے میں پولیس نے نظام قریشی کو گرفتار کر لیا ہے۔ سابق سماجوادی پارٹی سٹی سکریٹری نظام قریشی پر الزام ہے کہ وہ گزشتہ 3 جون (جمعہ) کو کانپور میں ہوئے تشدد کی منصوبہ بندی میں شامل تھے۔

جمعہ کے روز اتر پردیش کے کئی شہروں میں توہین رسالت کے خلاف احتجاجی مظاہرے دیکھنے کو ملے۔ اس سلسلے میں یوگی حکومت نے سخت کارروائی کی ہدایت پولیس افسران کو دے دی ہے۔ اس کا اثر ہفتہ کے روز صبح سے ہی دکھائی دے رہا ہے۔ صرف سہارنپور میں ہی اب تک 64 افراد کی گرفتاری کی خبریں سامنے آ رہی ہیں۔

شیوسینا ایم پی سنجے راؤت نے کہا، ’’بی جے پی کی ایک سیٹ کی جیت کوئی بڑی جیت نہیں ہے۔ ہم نے خرید و فروخت کرنے والوں کی شناخت کی ہے۔ ہمارے ایک ووٹ کو نااہل قرار دینے کی ضرورت نہیں تھی۔ ہم نے بی جے پی کے 2 ووٹوں پر اعتراض کیا لیکن اعتراض قبول نہیں کیا گیا۔ ایم ایل سی میں شیوسینا کو 2 سیٹیں، این سی پی کو 2 اور کانگریس کو 1 سیٹ حاصل ہوگی۔‘‘

مغربی بنگال میں گستاخ رسولؐ نوپور شرما کے خلاف احتجاج کا سلسلہ لگاتار جاری ہے۔ ہوڑہ کے پانچلا بازار میں پولیس اور مظاہرین کے ایک گروپ کے درمیان تازہ جھڑپ ہوئی ہے۔ پولیس نے مظاہرین کو منتشر کرنے کے لیے آنسو گیس کے گولے استعمال کیے، جس کے بعد پتھراؤ شروع ہو گیا۔

ہندوستان میں گزشتہ 24 گھنٹوں کے دوران کورونا وائرس کے 8329 نئے معاملے رپورٹ ہوئے ہیں۔ اس دوران 4216 مریض صحت یاب ہو گئے جبکہ 10 کی موت ہو گئی۔ ملک میں فعال کیسز کی تعداد 40370 ہو گئی ہے۔