اسرائیل-حزب اللہ جنگ: خامنہ ای کی تقریر ختم ہوتے ہی لبنان نے اسرائیل پر داغے راکٹ

یمن کے حوثیوں کی جانب سے اسرائیل کے دارالحکومت تل ابیب کے نواحی شہر ‘یافا’ کے ایک کلیدی ہدف پر حملے کا دعویٰ سامنے آرہا ہے۔ غیر ملکی ذرائع ابلاغ کے مطابق حوثیوں کے ترجمان یحییٰ السیری کا ویڈیو پیغام میں کہنا ہے کہ یافا میں ایک کلیدی ہدف کو ڈرون طیاروں کے ساتھ نشانہ بنایا گیا ہے۔

امریکی صدر جو بائیڈن نے کہا ہے ہم ایران کی تیل کی تنصیبات پر ممکنہ اسرائیلی حملوں پر بات کررہے ہیں اور ان کے اس بیان کے بعد عالمی منڈی میں تیل کی قیمتوں میں ایک مرتبہ پھر اضافہ ہوا ہے۔ خبر رساں ایجنسی اے ایف پی کے مطابق بائیڈن نے وائٹ ہاؤس میں صحافیوں سے گفتگو کرتے ہوئے کہا کہ ہمیں توقع نہیں ہے کہ کم از کم جمعرات تک اسرائیل، ایران کی جانب سے کیے گئے میزائل حملوں پر کسی قسم کی جوابی کارروائی کرے گا۔

حزب اللہ نے لبنان میں سرحد پر جھڑپوں کے دوران 17 اسرائیلی فوجیوں کو ہلاک کرنے کا دعویٰ کیا ہے۔ قطری نشریاتی ادارے ’الجزیرہ‘ کی رپورٹ کے مطابق ایرانی حمایت یافتہ لبنان کے گروپ حزب اللہ نے ٹیلی گرام پر جاری ایک بیان میں دعویٰ کیا ہے کہ جھڑپوں میں 17 اسرائیلی فوجوں کو ہلاک کیا ہے۔ تاہم، اسرائیلی فوج نے جنوبی لبنان پر حملے کے بعد سے اب تک صرف 9 جنگی ہلاکتوں کی تصدیق کی ہے۔

ایران کے سپریم لیڈر آیت اللہ علی خامنہ ای کی تقریر ختم ہونے کے فوراً بعد لبنان سے شمالی اسرائیل کی جانب راکٹ داغے گئے۔ خامنہ ای نے اپنی تقریر میں اسرائیلی حملے میں جان بحق ہونے والے حزب اللہ کے سربراہ نصر اللہ کو 'اپنا بھائی' قرار دیا تھا۔

ایران کے رہبر اعلیٰ آیت اللہ علی خامنہ ای نے نماز جمعہ کے بعد اپنے حامیوں کو خطاب کرتے ہوئے کہا کہ تباہی کا ازالہ کیا جائے گا اور آپ کے صبر کا صلہ عزت ملے گا۔ انھوں نے حزب اللہ کی تعریف کی اور کہا کہ اسرائیل اور امریکہ کا خواب جھوٹا ہے اور مزاحمت کا سلسلہ جاری رہے گا۔

آیت اللہ خامنہ ای نے اسرائیل پر ایرانی میزائل حملوں کو جائز قرار دیتے ہوئے کہا کہ یہ اسرائیل کے جرائم کی کم سے کم سزا ہیں۔ انھوں نے حزب اللہ کی طاقت کو سراہا اور کہا کہ دشمن ان تنظیموں کو مؤثر نقصان نہیں پہنچا سکا۔

اسرائیل کی حزب اللہ کے خلاف لڑائی میں شدت آئی ہے، جس کے نتیجے میں لبنان میں بمباری کے باعث ہزاروں افراد ہلاک اور لاکھوں بے گھر ہو چکے ہیں۔ اسرائیل نے حزب اللہ کے شدت پسندوں کی کاروائیوں کے جواب میں زمینی حملے شروع کر دیے ہیں۔

اسرائیلی فوج نے جنوبی لبنان کے 30 سے زائد گاؤں میں لوگوں کو فوری نقل مکانی کا حکم دیا ہے، انھیں خطرے سے آگاہ کیا گیا ہے کہ حزب اللہ کے قریب رہنے سے جان کو خطرہ ہو سکتا ہے۔

ایران میں حسن نصر اللہ کی ہلاکت کے بعد تعزیتی تقریب کا انعقاد کیا جا رہا ہے۔ ایرانی وزیر خارجہ لبنان پہنچ چکے ہیں، جب کہ اسرائیلی فوج نے بیروت میں بڑی بمباری کی۔ اطلاعات کے مطابق، اسرائیل نے حزب اللہ کے ممکنہ جانشین ہاشم صفی الدین کو نشانہ بنایا ہے۔