سریجن گھوٹالہ: بی جے پی مشکل میں، مودی کی بہن کے گھر انکم ٹیکس کا چھاپہ

انکم ٹیکس محکمہ نے ایک بڑی کارروائی کرتے ہوئے 6 ستمبر کو بہار کے نائب وزیر اعلیٰ سشیل کمار مودی کی بہن ریکھا مودی کے گھر پر چھاپہ ماری کی۔ ریکھا مودی کے پٹنہ واقع گھر پر سریجن گھوٹالہ معاملے میں ہوئی اس چھاپہ ماری کو انتہائی اہم قرار دیا جا رہا ہے۔ چھاپہ ماری کے دوران بہار پولس کی ٹیم بھی وہاں موجود تھی اور سخت پہرے میں پورا کام مکمل ہوا۔

دلچسپ بات یہ ہے کہ بہار کے سابق نائب وزیر اعلیٰ تیجسوی یادو لگاتار سشیل مودی پر اس گھوٹالے میں شامل ہونے کا الزام عائد کرتے رہے ہیں۔ اس سال جون میں ہی تیجسوی یادو نے ٹوئٹر پر کچھ کاغذات شیئر کرتے ہوئے بڑے الزامات لگائے تھے اور دعویٰ کیا تھا کہ سریجن گھوٹالے میں سشیل مودی کے رشتہ دار شامل ہیں۔ تیجسوی نے ٹوئٹر پر کئی دستاویزات بھی پوسٹ کیے تھے جن میں سریجن گھوٹالے میں استعمال کیے گئے بینک اکاؤنٹ کی تفصیل پیش کی گئی تھی۔

قابل ذکر ہے کہ سریجن گھوٹالے میں اب تک کئی لوگوں کو گرفتار کیا جا چکا ہے۔ فی الحال معاملے کی جانچ سی بی آئی کر رہی ہے۔ اس گھوٹالے میں کئی بڑے لیڈروں اور ان کے رشتہ داروں کے نام بھی سامنے آ چکے ہیں۔ جہاں تک سشیل مودی کی بہن ریکھا مودی کا سوال ہے، ان کے تعلقات سریجن کی بانی منورما دیوی سے تھے۔