دہلی: بٹلہ ہاؤس کی جھگیوں میں زبردست آتشزدگی، 80 جھگیاں خاکستر

راجدھانی دہلی کے جنوب مشرقی ضلع بٹلہ ہاؤس کی جھگیوں میں بدھ کو دیر رات شدید آگ لگ گئی جس میں تقریبا 80 جھگیاں جل کر راکھ ہو گئیں۔ محکمہ فائر بریگیڈ کے ایک افسر نے اس سلسلے میں بتایا کہ آگ لگنے کی اطلاع بدھ دیر رات تقریباً 1.30 بجے ملی۔ آگ کی اطلاع ملتے ہی موقع پرفائر انجن کی 10 گاڑیوں کو بھیجا گیا اور جمعرات کی صبح تقریباً تین بجے اس آگ پر قابو پا لیا گیا۔

فائر بریگیڈ کے افسر نے اس حادثہ کے بارے میں تفصیل بتاتے ہوئے کہا کہ ’’رسوئی گیس سلنڈر میں دھماکہ ہونے کے بعد آگ جھگیوں میں پھیل گئی اور تقریباً 80 جھگیوں کو اپنی زد میں لے لیا۔‘‘ ذرائع کے مطابق جھگی کے لوگوں نے اپنے طور پر آگ پر قابو پانے کی بہت کوشش کی لیکن یہ تیزی کے ساتھ پھیلتا جا رہا تھا جس کے بعد فائر بریگیڈ محکمہ کو خبر دی گئی۔ اس معاملے میں پولس تحقیقات کر رہی ہے۔ واقعہ میں فی الحال کسی کی ہلاکت کی خبر موصول نہیں ہوئی ہے۔

(یو این آئی ان پٹ کے ساتھ)