خوشخبری! ہندوستان اور یو اے ای کے درمیان آزادانہ تجارتی معاہدہ پر دستخط

وزیر برائے کامرس و صنعت پیوش گویل نے ہندوستان اور متحدہ عرب امارات (یو اے ای) کے درمیان آزادانہ تجارتی معاہدہ پر دستخط کی خوشخبری سنائی ہے۔ انھوں نے کہا کہ ہندوستان اور یو اے ای کے درمیان اس معاہدہ پر دستخط سے دو فریقی تجارت کو آئندہ پانچ سال میں 100 ارب ڈالر تک پہنچانے میں مدد ملے گی۔ اس کے ساتھ ہی لاکھوں کی تعداد میں روزگار کو بھی فروغ ملے گا۔

میڈیا رپورٹس کے مطابق پیوش گویل نے ہندوستان اور یو اے ای کے درمیان آزادانہ تجارتی معاہدہ (ایف ٹی اے) پر دستخط ہونے کے بعد نامہ نگاروں سے کہا کہ وسیع معاشی شراکت داری معاہدہ (سی ای پی اے) مئی میں اثرانداز ہو سکتا ہے اور پہلے دن سے ہی ہندوستانی مفاد سے جڑی تقریباً 90 فیصد مصنوعات کے لیے یو اے ای کو برآمد کا راستہ کھل جائے گا۔

بتایا جاتا ہے کہ وزیر اعظم نریندر مودی اور ابوظبی کے شہزادہ شیخ محمد بن زائد الناہیان کی آن لائن بات چیت کے دوران کاروباری معاہدہ پر دستخط کیا گیا۔ سمجھوتے پر ہندوستان کی طرف سے گویل اور یو اے ای کی طرف سے معاشی امور کے وزیر عبداللہ بن طوق المری نے دستخط کیے۔ دونوں ممالک نے مختلف شعبوں میں رشتوں کو مزید مضبوط بنانے کو لے کر خاکہ بھی جاری کیا۔

امید کی جا رہی ہے کہ آزادانہ تجارتی معاہدہ سے ہندوستان اور یو اے ای کی کمپنیوں کو بہت فائدہ پہنچے گا۔ اس میں بہتر بازار رسائی اور کم ٹیکس شرح شامل ہیں۔ اس ایف ٹی اے سے آئندہ پانچ سال میں دونوں ممالک کا دو فریقی کاروبار موجودہ 60 ارن ڈالر سے بڑھ کر 100 ارب ڈالر پہنچ جانے کی امید ہے۔

واضح رہے کہ ہندوستان اور یو اے ای نے تجارتی معاہدہ کے لیے رسمی بات چیت گزشتہ سال ستمبر میں شروع کی تھی۔ مجموعی طور پر 881 صفحات کے معاہدے کو ریکارڈ 88 دنوں میں مکمل کر لیا گیا۔ گویل نے کہا کہ یہ وسیع اور متوازن کاروباری معاہدہ ہے۔ انھوں نے مزید کہا کہ ’’یہ ایک نیا قابل ذکر سمجھوتہ ہے جس کا فائدہ دوا صنعت کو پہلی بار ملا ہے۔ یہ یو اے ای میں ہماری مصنوعات کے لیے دروازے کھولے گا۔ تجارتی مرکز کی وجہ سے یو اے ای مغربی ایشیا کے دیگر ممالک اور پورے افریقی براعظم کے لیے دروازہ ہے۔‘‘

اس معاہدہ سے امید کی جا رہی ہے کہ کپڑا، ہتھ کرگھا، زیورات، چمڑا اور جوتا-چپل جیسے شعبوں میں 10 لاکھ ملازمتوں کے مواقع تیار ہوں گے۔ طبی سیکٹر کے بارے میں گویل نے کہا کہ یو اے ای نے اتفاق ظاہر کیا ہے کہ یوروپی یونین، برطانیہ، کناڈا یا آسٹریلیا کے ذریعہ سرٹیفائیڈ ہندوستان میں بنی طبی مصنوعات کو درخواست جمع کرنے کے 90 دنوں کے اندر بازار رسائی اور ریگولیٹری منظوری حاصل ہوگی۔