گائے کے بعد بکری کو ماں ماننے کا مطالبہ، بکری کا گوشت بھی نہ کھانے کی اپیل

بی جے پی رہنما چندر کمار بوس اپنے ہی ایک بیان کے بعد اپنی پارٹی اور ہندووادیوں کے نشانہ پر آ گئے ہیں۔ انہوں نے بیان میں کہا تھا کہ ہندو بکری کا دودھ پیتے ہیں تو بکری کو بھی گائے کی طرح ماں کا درجہ دینا چاہئے ۔ چندر کمار بوس مغربی بنگال بی جے پی یونٹ کے نائب صدر ہیں اور جنگ آزادی میں حصہ لینے والے سبھاش چندر بوس کے پڑپوتے ہیں۔

دلچسپ بات یہ ہے کہ چندر کمار بوس کے بیان سے بی جے پی حامی اور دیگر ہندووادی تو ناراض ہو ہی گئے ہیں، تریپورا کے گورنر تتھاگت رائے بھی ان سے سخت برہم ہیں ۔ تتھاگت رائے اور چندر کمار بوس میں ٹوئٹر پرلفظی جنگ بھی شروع ہو گئی ہے۔

چندر بوس نے جمعرات کو ایک ٹوئٹ میں کہا تھا کہ گاندھی جی جب کلکتہ آتے تھے تو میرے بابا شرت چندر بوس کے وڈبرن پارک میں واقع گھر پر ہی ٹھہر تے تھے ۔انھو ں نے بکری کا دودھ پینے کی مانگ کی تھی ۔اسی لئے گھر پر دو بکریوں کو پالا گیا تھا ،بکری کا دودھ پینے کی وجہ سے گاندھی جی اسے ماں کا درجہ دیتے تھے ۔ اس لئے ہندوؤں کو بکری کا گوشت کھانا چھوڑ دینا چاہیے ۔

چندر بوس کے ٹوئٹ کرنے کے تین گھنٹے بعد تتھاگت رائے نے جواب دیا ”نہ گاندھی جی نے، نہ ہی آپ کے دادا بوس نے کبھی یہ کہا کہ بکری ہماری ماتا ہے یہ صرف آپ کہہ رہے ہیں ۔ ہم ہندو گائے کو اپنی ماتا مانتے ہیں نہ کہ بکری کو ، ہماری گزارش ہے کہ آپ ایسا بیان نہ دیں ۔“

بیان پر ٹرول ہونےکے بعد چند ر کماربوس نے صفائی دیتے ہوئے کہا کہ ان کے ٹوئٹ کا غلط مطلب نکالا جارہا ہے ۔ان کی بات کو گہرائی سے سمجھنے کی ضرورت ہے ۔

واضح رہے کہ چندر بوس نے سال 2016 میں بی جی پی کی رکنیت حاصل کی تھی اور ممتا بنرجی کے خلاف بھوانی پور سے چناؤ بھی لڑا تھا۔

محمد تسلیم