مصر کے صدر عبدالفتح السیسی کا دہلی میں استقبال، یومِ جمہوریہ پریڈ میں ہوں گے مہمانِ خصوصی

مصر کے صدر عبدالفتح السیسی منگل کی شام دہلی پہنچ گئے۔ ایئرپورٹ پر ان کا گرمجوشی سے استقبال کیا گیا اور ہندوستانی دورہ کے درمیان وہ ہندوستانی صدر دروپدی مرمو، وزیر اعظم نریندر مودی، وزیر خارجہ ڈاکٹر ایس جئے شنکر وغیرہ سے ملاقات کریں گے۔ مصری صدر السیسی کو ہندوستان نے یومِ جمہوریہ پریڈ میں بطور مہمانِ خصوصی شریک ہونے کے لیے مدعو کیا ہے، لیکن امید کی جا رہی ہے کہ اس دورہ میں کچھ اہم معاہدے بھی طے پائیں گے۔

میڈیا رپورٹس کے مطابق 24 سے 27 جنوری کے اس آفیشیل دورہ میں مصری صدر عبدالفتح السیسی کے ساتھ مصر کے پانچ وزرا اور سینئر افسران سمیت ایک اعلیٰ سطحی نمائندہ وفد بھی ہندوستان آیا ہے۔ جیسے ہی السیسی نئی دہلی پہنچے تو ان کے استقبال کے لیے روایتی رقص پیش کیا گیا اور پھر انھیں اس جگہ لے جایا گیا جہاں وہ قیام کریں گے۔

واضح رہے کہ یہ پہلی مرتبہ ہے جب مصر کے صدر کو یومِ جمہوریہ میں مہمانِ خصوصی کے طور پر مدعو کیا گیا ہے۔ خاص طور سے ہندوستان اور مصر جب اپنے سفارتی تعلقات کے 75 سال مکمل کر چکا ہے تو السیسی کا یہ دورہ کافی اہم تصور کیا جا رہا ہے۔ ہندوستان اس سال جی-20 کی صدارت کر رہا ہے اور اس نے مصر کو ’مہمان ملک‘ کی شکل میں مدعو بھی کیا ہے۔