دیوگوڑا اور ان کے بیٹے کماراسوامی کے درمیان اختلافات ظاہر

کرناٹک انتخابات میں وزیر اعلیٰ سدارمیّا کی منگل کی صبح خوشگوار ہوتی نظر آئی جب جنتا دل سیکولر (جے ڈی ایس) سربراہ اور سابق وزیر اعظم ایچ ڈی دیوگوڑا نے انتخابی کمیشن سے سوال کیا کہ کرناٹک کے کچھ کانگریس لیڈر ان پر پڑنے والا محکمہ انکم ٹیکس کا چھاپہ کیا سیاست سے متاثر ہے۔

اس درمیان کنڑ نیوز چینل ٹی وی9 کی خبروں کے مطابق دیوگوڑا نے واضح طور پر کہا کہ ان کی پارٹی جے ڈی ایس ورونا اور کرشنا راجہ کی سیٹیں ہار رہی ہے۔ میسورو میں ایک پریس کانفرنس میں دیوگوڑا نے کہا کہ ان کی پارٹی میسورو کی 11 میں سے 9 سیٹیں جیتے گی لیکن ورونا اور کرشنا راجہ سیٹ پر نہیں۔ قابل ذکر ہے کہ ورونا سیٹ سے سدارمیّا دو بار ممبر اسمبلی رہے ہیں اور اس بار ان کے بیٹے یتیندر کانگریس کے امیدوار ہیں۔

دیوگوڑا کے ذریعہ خاص طور سے ان دو سیٹوں کا ذکر کرنا اہم مانا جا رہا ہے۔ پرانے میسورو کو کانگریس اور کچھ حد تک جے ڈی ایس کا قلعہ مانا جاتا ہے۔ یہاں بی جے پی کی اتنی پکڑ نہیں ہے۔ سیاسی تجزیہ نگار بھی بی جے پی کو یہاں تیسرے نمبر پر ہی تصور کرتے ہیں۔ ایسے میں دیوگوڑا کے اس بیان کے یہی معنی نکالے جا رہے ہیں کہ وہ اپنے حامیوں اور پارٹی کارکنان کو اپنا ووٹ کانگریس کو دینے کا اشارہ کر رہے ہیں۔

دیوگوڑا کا یہ بیان اس لیے بھی اہم ہے کیونکہ ایک دن پہلے ہی کانگریس صدر راہل گاندھی نے کہا تھا کہ جے ڈی ایس کو دھیان رکھنا ہوگا کہ جے ڈی ایس میں ’ایس‘ کا مطلب سیکولر ہے یا فیملی۔ انھوں نے کہا تھا کہ دیوگوڑا کو واضح کرنا ہوگا کہ وہ کس نظریہ کے ساتھ ہیں۔

کرناٹک میں یہ بحث زور پکڑتی جا رہی ہے کہ کسی بھی پارٹی کو واضح اکثریت نہ ملنے کی حالت میں جے ڈی ایس بی جے پی کے ساتھ جا سکتا ہے۔ دوسری طرف پیر کے روز ایچ ڈی کماراسوامی نے اپنی پارٹی جے ڈی ایس کا انتخابی منشور جاری کرتے ہوئے کہا تھا کہ ان کی پارٹی اس کی حمایت کرے گی جو ان کے منشور میں کیے گئے وعدوں کو پورا کرے گی۔

یہ بات بھی گرم ہے کہ حال ہی میں کرناٹک دورہ پر آئیں مایاوتی نے دیوگوڑا کو سمجھایا کہ وہ بی جے پی سے دوری بنا کر چلیں۔ کرناٹک میں بی ایس پی کا جے ڈی ایس کے ساتھ اتحاد ہے۔ مانا جا رہا ہے کہ مایاوتی اس بات سے ناراض ہیں کہ جے ڈی ایس ان کوششوں کو دھچکا پہنچا سکتی ہے جو ایک سیکولر اپوزیشن بنانے کےتیاری چل رہی ہے۔ لیکن دیوگوڑا کے اس بیان کے بعد اشارہ مل رہا ہے کہ جے ڈی ایس نے بی جے پی سے دوری اور کانگریس سے نزدیکی بنانے کی کوشش شروع کر دی ہے۔