مالدیپ میں 9 مزدوروں کی جھلسنے سے موت، ہندوستانی ہائی کمیشن نے کیا اظہارِ افسوس

مالدیپ کی راجدھانی مالے میں جمعرات کو غیر ملکی مزدوروں کے گھروں میں شدید آگ لگنے کا واقعہ پیش آیا۔ اس آتشزدگی میں کم از کم 10 لوگوں کی موت واقع ہو گئی ہے۔ حادثہ میں کئی لوگ زخمی بھی ہوئے ہیں جن کا علاج قریبی اسپتالوں میں چل رہا ہے۔ مہلوکین میں سے 9 مزدوروں کا تعلق ہندوستان سے ہے جبکہ ایک کے بارے میں بتایا جاتا ہے کہ وہ بنگلہ دیشی ہے۔

فائر بریگیڈ سروس کے ایک افسر نے حادثہ سے متعلق بتایا کہ انھیں آگ پر قابو پانے میں چار گھنٹے کا وقت لگا۔ آگ میں تباہ ہوئی ایک عمارت کی اوپری منزل سے انھوں نے دس لاشیں برآمد کی ہیں۔ بتایا جا رہا ہے کہ آگ بلڈنگ کے گراؤنڈ فلور کے کار رپیئرنگ گیراج میں لگی تھی۔

اس واقعہ کے بعد مالدیپ میں ہندوستانی ہائی کمیشن کا بیان سامنے آیا ہے۔ ہندوستانی ہائی کمیشن نے مالے مین آگ لگنے کے اس واقعہ پر اپنا افسوس ظاہر کیا جس میں 9 ہندوستانی شہریوں سمیت مجموعی طور پر 10 لوگوں کی موت ہو گئی ہے۔ ہندوستانی سفارتخانہ نے کہا کہ وہ اس واقعہ کو لے کر مالدیپ حکومت کے رابطہ میں ہیں۔ ہندوستانی ہائی کمیشن نے متاثرین کی مدد کے لیے جاری کردہ ہیلپ لائن نمبر بھی جاری کیا ہے۔

مالدیپ حکومت کے ایک اعلیٰ افسر نے بتایا کہ پولیس مہلوکین کی مدد کے لیے ہر ممکن کوشش کر رہی ہے۔ مالدیپ کے نیشنل ڈیزاسٹر مینجمنٹ اتھارٹی نے اس حادثہ کے بعد ٹوئٹ کر بتایا کہ مالے میں لگی آگ کے متاثرین کے لیے ایک اسٹیڈیم میں راحت اور بچاؤ سنٹر بنایا گیا ہے۔