لاک ڈاؤن میں اچانک کانگریس دفتر پہنچے راہل گاندھی، مہاجر مزدوروں نے سنائی داستانِ غم

ہندوستان میں لاک ڈاؤن کےد رمیان مزدوروں کی حالت زار، ہندوستان کی خستہ ہوتی معیشت اور کورونا سے مقابلہ کے لیے ضروری اقدامات کے تعلق سے کانگریس لیڈر راہل گاندھی لگاتار سرگرم نظر آ رہے ہیں۔ ایک طرف تو وہ کانگریس لیڈران اور کارکنان سے بار بار اپیل کر رہے ہیں کہ ضرورت مندوں کی مدد کے لیے وہ آگے آئیں، اور دوسری طرف ماہرین معیشت سے موجودہ حالات پر گفتگو کر رہے ہیں، ساتھ ہی سوشل میڈیا کے ذریعہ مرکز کی مودی حکومت کو نیک مشورے بھی دے رہے ہیں تاکہ مشکل حالات کو سنبھالا جا سکے۔

اس درمیان کانگریس کے سابق صدر راہل گاندھی 13 مئی کو اچانک دہلی کانگریس دفتر پہنچ گئے۔ ان کے اس اچانک دورے سے وہاں موجود کانگریس لیڈران و کارکنان کے ساتھ ساتھ وہ مہاجر مزدور بھی حیران رہ گئے جو رجسٹریشن کرانے کے لیے جمع ہوئے تھے۔ دراصل راہل گاندھی راحتی کاموں کا جائزہ لینے کے لیے کانگریس دفتر پہنچے تھے اور انھوں نے دیکھا کہ ایک طرف مہاجر مزدوروں کے رجسٹریشن کا کام چل رہا ہے، تو دوسری طرف کانگریس کی رسوئی میں بھی کام جاری ہے۔

راہل گاندھی کے اچانک دہلی کانگریس دفتر پہنچنے سے متعلق ایک رپورٹ ہندی نیوز پورٹل 'اے بی پی' پر شائع ہوئی ہے جس میں کانگریس ذرائع کے حوالہ سے لکھا گیا ہے کہ منگل کی دوپہر راہل گاندھی دہلی پردیش کانگریس دفتر پہنچے جہاں انھوں نے تقریباً ڈیڑھ گھنٹے کا وقت گزارا۔ انھوں نے دہلی کانگریس کے ریاستی صدر انل چودھری سے طویل بات چیت کی اور پارٹی کے ذریعہ چلائے جا رہے راحت کاموں کا جائزہ لیا۔ راہل گاندھی نے ضرورت مندوں کے کھانے پینے سے لے کر دہلی کے سبھی علاقوں میں پارٹی کارکنان کے ذریعہ چل رہی سینیٹائزیشن مہم کی بھی جانکاری لی۔ پارٹی صدر سونیا گاندھی کی ہدایت پر مہاجر مزدوروں کی گھر واپسی کے لیے ٹکٹ کے خرچ کا انتظام بھی کیا جا رہا ہے، اس کام کا بھی راہل گاندھی نے جائزہ لیا۔

بتایا جاتا ہے کہ راہل گاندھی نے اس درمیان پارٹی دفتر میں موجود کئی مہاجر مزدوروں سے بات چیت کرتے ہوئے ان کی تکلیفوں سے آشنا ہونے کی کوشش کی۔ مہاجر مزدوروں نے بھی دل کھول کر اپنی داستانِ غم راہل گاندھی کو سنایا اور بتایا کہ کس طرح وہ لاک ڈاؤن میں بری طرح پھنس کر رہ گئے ہیں۔ نہ ان کے پاس کھانے کے لیے دانہ ہے، نہ کچھ خریدنے کے لیے پیسے۔ راہل گاندھی نے ایک ایک کر کے مختلف ریاستوں سے تعلق رکھنے والے کئی مہاجر مزدوروں سے بات کی۔

پارٹی ذرائع کے حوالہ سے 'اے بی پی' نے اپنی رپورٹ میں بتایا کہ راہل گاندھی کا یہ اچانک دورہ عام بات ہے۔ لیکن لاک ڈاؤن کے وقت اس دورہ کو کافی اہم قرار دیا جا رہا ہے کیونکہ راہل گاندھی ایک طرف مرکز کی مودی حکومت کو ان کی غلط پالیسیوں کے لیے لگاتار تنقید کا نشانہ بنا رہے ہیں اور دوسری طرف ضرورت مندوں کی مدد کے لیے کانگریس لیڈران و کارکنان کو آگے بڑھا رہے ہیں۔ مہاجر مزدوروں میں بھی یہ پیغام صاف طور پر جا رہا ہے کہ مودی حکومت نے جو مشکلات ان کے لیے پیدا کر دی ہے، اس سے نکالنے کا کام کانگریس اس وقت کر رہی ہے۔