کیا منوہر پاریکر کے پاس رافیل سودے کے راز ہیں؟

وزیر اعظم نریندر مودی اور بی جے پی صدر امت شاہ میں اتنی ہمت نہیں ہے کہ وہ گوا کے بیمار وزیر اعلی منوہر پاریکر کو ان کے عہدے سے ہٹا سکیں، کیونکہ رافیل سودے کے بارے میں ان کے پاس بےشمار راز ہیں جن سے بڑے معاملوں کا پردہ فاش ہو سکتا ہے۔ یہ الزام کانگریس کے گوا یونٹ نے لگایا ہے۔

گوا کانگریس کے صدر گریش چوڈانکر نے اتوار کو کہا کہ ’’بی جے پی کی اعلیٰ قیادت میں اتنی ہمت نہیں ہے کہ وہ بیماری کے چلتے کام کرنے سے مجبور وزیر اعلی منوہر پایکر سے استعفی مانگ سکیں کیونکہ پاریکر سابق وزیر دفاع رہ چکے ہیں اور ان کے پاس رافیل سودے سے جڑے بہت سارے راز ہیں۔ اگر استعفی مانگنے سے ناراض پاریکر نے منہ کھول دیا تو غضب ہو جائے گا‘‘۔

چوڈانکر نے یہ الزام بی جے پی صدر امت شاہ کے اس اعلان کے بعد لگایا جس میں شاہ نے کہا کہ منوہر پایکر گوا کے وزیر اعلی بنے رہیں گے۔

امت شاہ نے یہ بھی کہا کہ ’’گوا بی جے پی کی کور ٹیم کے ساتھ بات چیت کے بعد ہی یہ فیصلہ ہوا ہے کہ منوہر پاریکر وزیر اعلی بنے رہیں گے اور گوا کی کابینہ اور وزیروں کے قلم دانوں میں تبدیلی کی جائے گی‘‘۔

غور طلب ہے کہ منوہر پاریکر کو پینکریاٹک کینسر ہے۔ گوا، نیو یارک اور ممبئی میں علاج کرانے کے بعد وہ گزشتہ ایک ہفتے سے دہلی کے ایمس میں زیر علاج ہیں۔ امت شاہ کے اعلان کے بعد گوا کانگریس کے صدر نے دعوی کیا ہے کہ ’’پاریکر کے پاس رافیل سے جڑی تما م معلومات ہیں کیونکہ سودے کے وقت وہ ہی وزیر دفاع تھے۔ پاریکر استعفی دینے سے انکار کر چکے ہیں اور ان سے استعفے کے لئے کہنے کی کسی کی ہمت نہیں ہے اور وجہ ہے رافیل ڈیل، وجہ ہے ایک بڑا گھوٹالہ جس میں سیدھے وزیر اعظم شامل ہیں‘‘۔

گوا کانگریس کے صدر نے پارٹی دفتر میں صحافیوں سے خطاب کرتے ہوئے کہا ’’مجھے لگتا ہے پاریکر اب ان کا استعمال کر رہے ہیں اور کہہ رہے ہیں کہ اگر آپ استعفے کے لئے کہیں گے تو میں آ پ کو رافیل ڈیل میں بےنقاب کر دونگا۔ وہ (شاہ اور مودی) بلیک میل کئے جا رہے ہیں‘‘۔ چوڈانکر نے کہا کہ بیمار شخص کو وزیر اعلی بنائے رکھنا واضح طور پر غلط ہے‘‘۔