وائی ایس آر کانگریس کے سربراہ جگن موہن ریدی پر چاقو سے حملہ، ملزم گرفتار

آندھرا پردیش میں وائی ایس آر کانگریس کے سربراہ جگموہن ریڈی پر حملہ کی خبر منظر عام پر آئی ہے۔ بتایا جا رہا ہے کہ وشاکھاپٹنم ایئر پورٹ پر ایک شخص نے ان پر چاقو سے حملہ کر دیا۔ حملہ کے بعد پولس نے ملزم کو حراست میں لے لیا اور پوچھ گچھ کی جا رہی ہے۔ حملے کے بعد ریڈی کے ہاتھ سے خون بہتا دیکھا جا سکتا ہے۔

ملزم سے ہتھیار بھی برآمد کر لیا گیا ہے۔ اطلاعات کے مطابق واقعہ اس وقت پیش آیا جب جگموہن ریڈی ایئرپورٹ لاؤنج میں بورڈنگ کا انتظار کر رہے تھے۔ دریں اثنا ایک نامعلوم شخص ان کے نزدیک آیا اور سیلفی لینے کی درخواست کرنے لگا۔ اس کے بعد اس نے اچانک چاقو نکال لیا اور ریڈی پر حملہ کر دیا۔ ملزم کو فوری طور پر حراست میں لے لیا گیا ہے۔

پولس نے بتایا کہ جگن موہن ریڈی صحیح سلامت ہیں اور انہیں کسی دوسرے مقام پر لے جایا گیا ہے۔ جس وقت حملہ کیا گیا ریڈی کے ساتھ ان کے حامی بھی موجود تھے۔ اس واقعہ کے بعد ایئرپورٹ کی سیکورٹی پر بھی سوالیہ نشان لگ گئے ہیں۔

وائی ایس آر کانگریس کے سربراہ جگن موہن ریڈی پر حملہ کی آل انڈیا مجلس اتحاد المسلمین (اے آئی ایم آئی ایم) کے سربراہ اسد الدین اویسی نے مذمت کی ہے۔ انہوں نے ٹوئٹ میں کہا، ’’یہ حادثہ سیکورٹی میں ایک بڑی کوتاہی ہے جس کی لازمی طور پر جانچ ہونی چاہیے۔‘‘ اویسی نے مزید کہا کہ ایک شخص ایئرپورٹ میں چاقو لے کر کس طرح گھس سکتا ہے۔