رام ولاس پاسوان کی زندگی سے بہت کچھ سیکھ سکتے ہیں نوجوان لیڈر: مودی

پٹنہ: وزیراعظم نریندر مودی نے لوک جن شکتی پارٹی ( ایل جے پی) کے بانی رام ولاس پاسوان کی پہلی برسی کے موقع پر آج خط لکھ کر کہا کہ ان کی زندگی سے (پاسوان) بہت کچھ سیکھ سکتے ہیں نوجوان لیڈر۔ وزیراعظم مودی نے ایل جے پی کے بانی رام ولاس پاسوان کے بیٹے اور بہار کے جموئی سے رکن پارلیمنٹ چراغ پاسوان کو دو صفحے پر مبنی خراج عقیدت کا پیغام لکھا ہے۔ سابق مرکزی وزیر اور ایل جے پی بانی کی برسی پروگرام اتوار کو دار الحکومت پٹنہ کے شری کرشن پوری واقع رکن پارلیمنٹ چراغ پاسوان کی رہائش گاہ پر منعقد کی گئی ہے۔ رکن پارلیمنٹ چراغ پاسوان نے وزیراعظم کے لکھے خط کو اپنے فیس بک پیج پر شیئر کر انہیں مبارکباد پیش کی ہے۔

پی ایم مودی نے اپنے خط میں لکھا ہے کہ ”ملک کے عظیم سپوت بہار کا فخر اور سماجی انصاف کی بلند آواز رہے آنجہانی رام ولاس پاسوان کو میں اپنا جذباتی خراج عقیدت پیش کرتا ہوں۔ یہ میرے لئے بہت ہی اہم دن ہے۔ میں آج انہیں نہ صرف اپنے قریبی دوست کے طور پر یاد کر رہا ہوں بلکہ ہندوستانی سیاست میں ان کے چلے جانے سے جو خلا پیدا ہوا ہے اسے بھی محسوس کر رہا ہوں۔ آزاد ہندوستان کی سیاسی تاریخ میں پاسوان جی کا ہمیشہ اپنا ایک الگ مقام رہا۔ وہ ایک بہت ہی عام درجے سے اٹھ کر اونچائی تک پہنچے۔“

وزیراعظم نے خط میں لکھا ہے کہ قومی جمہوری اتحاد حکومت کے چھ سالوں میں بھی انہوں نے اسی توانائی کے ساتھ خود کو عوامی مفادات سے منسلک فیصلوں کے لئے وقف رکھا۔ ان کی کوششوں سے ملک کو صارفین حقوق اور عوامی نظام تقسیم سے متعلق متعدد موثر اقدامات اٹھانے میں مدد ملی۔ آج جو نوجوان سیاست کو جاننا اور سمجھنا چاہتے ہیں پاسوان کی زندگی انہیں کافی کچھ سیکھا سکتی ہے۔

خط میں کہا گیا ہے کہ ” اقتدار کی اونچائیوں پر پہنچ کر بھی وہ ہمیشہ اپنے کارکنان کے لئے قابل رسائی رہتے تھے اور ان کے سکھ ۔ دکھ میں شراکت دار رہتے تھے۔ انہوں نے ہمیشہ بات چیت اور ہم آہنگی میں یقین رکھا۔ یہی وجہ ہے کہ تمام سیاسی جماعتوں کے لیڈران کے ساتھ ان کے بہتر تعلقات رہے۔ ہمیشہ چہرے پر مسکان لئے ملنے والے رام ولاس جی سبھی کے تھے، جن ۔ جن کے تھے۔ میں رام ولاس جی کے کنبہ کے سبھی اراکین کے لئے ان کے سبھی حامیوں کے لئے بہتر صحت اور خوشحالی کی تمنا کرتا ہوں۔“