یو پی: ’تم فیزکس میں فیل ہو، پاس ہونا ہے تو 5000 روپے بھیجو‘

اتر پردیش میں ایک طرف ٹیچر گھوٹالہ سرخیوں میں ہے، اور دوسری طرف یو پی بورڈ امتحان کا ریزلٹ آنے سے قبل ایک حیران کر دینے والا معاملہ سامنے آیا ہے۔ ریزلٹ آنے سے محض ایک ہفتے قبل بارہویں امتحان دینے والے ایک طالب علم کے پاس نامعلوم افراد کا فون آتا ہے جو کہتا ہے کہ "تم فیزکس میں فیل ہو۔ اگر پاس ہونا ہے تو پانچ ہزار روپے بھیجو۔" فون کرنے والا کہتا ہے کہ وہ یو پی بورڈ کے پریاگ راج آفس سے بول رہا ہے۔

جس طالب علم کے پاس فون آیا ہے اس کا نام دھیریندر کمار ہے اور فیزکس میں فیل ہونے کی بات سن کر اس نے پوری تفصیل اپنے والد کو بتائی۔ سب کچھ سننے کے بعد طالب علم کے والد بھی حیران رہ گئے۔ پھر انھوں نے اس سلسلے میں سخت قدم اٹھانے کا فیصلہ کیا اور تھانہ پہنچ کر شکایت درج کرتے ہوئے کارروائی کا مطالبہ کیا ہے۔ بتایا جاتا ہے کہ دھیریندر کمار نظام آباد تھانہ علاقہ کے غوث پور گھوری گاؤں کا باشندہ ہے۔ اس نے یو پی بورڈ امتحان 2020 میں انٹرمیڈیٹ کا امتحان دیا ہے اور اپنے ریزلٹ کا انتظار کر رہا ہے۔

ایک ہندی نیوز پورٹل پر شائع خبر کے مطابق جمعرات (18 جون) کی صبح 10 بجے دھیریندر کے موبائل پر ایک کال آتی ہے۔ کال کرنے والا کہتا ہے کہ میں کمپیوٹر پر تمھارا ریزلٹ تیارکر رہا ہوں۔ تم فیزکس میں فیل ہو گئے ہو۔ اگر تم پاس ہونا چاہتے ہو تو میرے بینک اکاؤنٹ میں فوراً پانچ ہزار روپے بھیجو۔ اس کے بعد اس شخص نے وہاٹس ایپ پر اپنا ایس بی آئی اکاؤنٹ نمبر بھیجا۔ ساتھ ہی اس نے دھیریندر کے وہاٹس ایپ پر مارک شیٹ بھی بھیجی، لیکن پھر اسے ڈیلیٹ کر دیا۔

فون کرنے والے نے دھیریندر سے کہا کہ اگر وہ پاس ہونا چاہتا ہے تو خاموشی کے ساتھ پیسے بینک میں ٹرانسفر کر دے اور کسی سے اس کے بارے میں نہ کہے۔ اس نے یہ دھمکی بھی دی کہ اگر کسی سے یہ بات بتائی تو اسے تین سال تک یو پی بورڈ امتحان میں بیٹھنے سے روک دیا جائے گا۔ یہ سب سن کر دھیریندر گھبرا گیا اور اس نے پوری بات اپنے والد سے بتا دی۔

شکایت درج ہونے کے بعد معاملے کی تحقیقات شروع ہو گئی ہے۔ اس کیس میں انچارج انسپکٹر انور علی خان سے جب بات کی گئی تو انھوں نے بتایا کہ "معاملے کی جانچ کی جا رہی ہے۔ بینک اکاؤنٹ نمبر سے لے کر موبائل نمبر تک کی جانچ ہو رہی ہے۔ جلد ہی اس تعلق سے جانکاریاں حاصل ہو جائیں گی اور اگر یہ سب کوئی گینگ کر رہا ہے تو اس کا پردہ فاش کر قصورواروں کے خلاف سخت کارروائی کی جائے گی۔"